Jizzaxda haydovchi eshakni mashinada sudradi
Holat yuzasidan haydovchiga qonuniy chora ko‘rildi.
Jizzax viloyati Zafarobod tumanida fuqaro avtomashinasi ortida eshakni sudrab ketayotgani aniqlandi. Bu haqda “Zamon” dasturi xabar berdi.
Ma’lum qilinishicha, hodisa ijtimoiy tarmoqlarda tarqalgan videoda aks etgach, viloyat ichki ishlar organlari haydovchini aniqlab, unga nisbatan ma’muriy bayonnoma rasmiylashtirgan.
Haydovchining aytishicha, u Namangan viloyati Pop tumanidan ko‘chat olib kelayotganida avtomashinasida nosozlik yuzaga kelgan. Keyin haydovchi eshak dimiqib qolmasligi uchun yukxonadan uni tushirgan. Haydovchi transport vositasi tuzatilganidan so‘ng eshakni yana yuklash uchun sharoit paydo bo‘lmagani u sabab uni 100- 150 metrgacha sudrab borgan. Haydovchi o‘z harakatidan pushaymon ekanini bildirgan.
Hodisa yuzasidan unga nisbatan Ma’muriy javobgarlik to‘g‘risidagi kodeksning 111-moddasi (Hayvonlarga shafqatsiz munosabatda bo‘lish) bo‘yicha ma’muriy bayonnoma rasmiylashtirildi. Hujjatlar sudga yuborilgan va qonuniy qaror qabul qilinishi kutilmoqda.
Mazkur moddaga ko‘ra, hayvonlarga shafqatsiz munosabatda bo‘lish jarima yoki 15 sutkagacha ma’muriy qamoqqa olishga sabab bo‘lishi mumkin. Agar huquqbuzarlik takror sodir etilsa yoki hayvonning o‘limiga olib kelsa, jazo yanada qattiqlashadi.
