Kobulda giyohvandlar shifoxonasi portlatildi: 400 kishi halok bo‘ldi

Afg‘oniston hukumati Pokiston harbiylarini Kobul shahridagi giyohvandlikdan davolash shifoxonasiga havo hujumi uyushtirib, kamida 400 kishining o‘limiga sabab bo‘lganlikda aybladi. Bu haqda Al Jazeera xabar berdi.

 

“Tolibon” hukumati vakillariga ko‘ra, zarba Kobuldagi “Umar” nomli reabilitatsiya markaziga mahalliy vaqt bilan soat 21:00 atrofida berilgan. Matbuot kotibi o‘rinbosari Hamidulloh Fitratning bildirishicha, 2000 o‘rinli shifoxonaning katta qismi vayron bo‘lgan.

 

Dastlabki ma’lumotlar hujum oqibatida kamida 400 kishi halok bo‘lganini, yana 250 ga yaqin fuqaro jarohatlanganini ko‘rsatmoqda. Qutqaruv xizmatlari voqea joyida yong‘inni o‘chirish va vayronalar ostidan jasadlarni chiqarish ishlarini davom ettirmoqda.

 

Voqea guvohi, shifoxona qo‘riqchisi Omid Stanikzay hujumdan oldin osmonda harbiy samolyot ovozlari eshitilganini aytdi. 

 

“Atrofimizda harbiy qismlar bor edi. Ushbu harbiy bo‘linmalar samolyotga qarata o‘q uzganida, samolyot bomba tashlagan va yong‘in chiqqan. Halok bo‘lganlar va jarohatlanganlarning barchasi tinch aholi vakillari edi”, — dedi u.

 

“Tolibon” rasmiy vakili Zabihulloh Mujohid ushbu zarbani keskin qoralab, Pokistonni Afg‘oniston havo hududini buzishda va tinch obyektni nishonga olishda aybladi. U bu holatni “xalqaro tamoyillar va insoniyatga qarshi jinoyat” deb atadi.

 

Pokiston tomoni esa ayblovlarni rad etdi. Bosh vazir Shahboz Sharif matbuot kotibi Musharraf Zaydiy Kobulda hech qanday shifoxona nishonga olinmaganini bildirib, bu da’volarni “asossiz” deb atadi.

 

Pokiston Axborot vazirligi bayonotiga ko‘ra, 16-mart kuni amalga oshirilgan zarbalar faqat harbiy obyektlar va terrorchilik infratuzilmasiga qaratilgan. Rasmiylar ushbu obyektlar Kobul va Nangarhor viloyatlarida joylashgan bo‘lib, Pokistonga qarshi hujumlarda foydalanilganini da’vo qilmoqda.

 

Shuningdek, Islomobod Afg‘onistonni Pokistonda faoliyat yuritayotgan “Tahriki Tolibon Pokiston” jangarilariga boshpana berishda ayblab kelmoqda. “Tolibon” rasmiylari esa bu iddaolarni bir necha bor inkor etgan.

 

Hozircha voqea yuzasidan mustaqil manbalar orqali tasdiqlangan yakuniy ma’lumotlar mavjud emas. Vaziyat ikki davlat o‘rtasidagi taranglikni yanada kuchaytirishi mumkin.