Ko‘chmas mulk va transport sotuvida hisob-kitoblar endilikda naqdsiz shaklda amalga oshiriladi

O‘zbekistonda Prezidentning 2025 yil 10 dekabrdagi PF-246-sonli farmoniga binoan ko‘chmas mulk va transport vositalarini sotib olish va sotishda hisob-kitoblar tizimi o‘zgardi. Bu haqda “Huquqiy axborot” Telegram-kanalida xabar berildi.

 

Ma’lum qilinishicha, endilikda bu operatsiyalar nafaqat notarius orqali, balki banklar bilan elektron ma’lumotlar almashish orqali amalga oshiriladi.

 

Farmonda naqdsiz hisob-kitoblarni ommalashtirish va yashirin iqtisodiyot ulushini qisqartirishga qaratilgan qo‘shimcha chora-tadbirlar belgilab berilgan.

 

Shu munosabat bilan Adliya vazirligi 2026 yil 16 martda  notariuslar va banklar o‘rtasida elektron ma’lumotlar almashish tartibini tasdiqladi.

 

Qoidalarga ko‘ra, 2026 yil 1 apreldan boshlab:

 

— ko‘chmas mulk obyektlari,

 

— ishlab chiqarilganiga 10 yildan oshmagan M, N, O va G toifadagi transport vositalari,

 

— maxsus avtotransport vositalari sotib olinganda, hisob-kitoblar notarius va banklar o‘rtasidagi elektron ma’lumotlar orqali aniqlanadi.

 

Yangi tartibga muvofiq:

 

— Xaridor yoki uning vakili bangga yozma yoki elektron ariza bilan murojaat qiladi;

 

— Bank pul mablag‘larini eskrou hisobvarag‘iga kiritadi;

 

— Kredit asosida amalga oshirilsa, bank notariusga elektron ma’lumot yuborishi shart;

 

— Xaridorning bank hisobvarag‘i eskrou hisobvarag‘i sifatida foydalanilishi mumkin;

 

— Notarius mablag‘lar mavjudligini elektron tarzda tekshirib, shartnomani rasmiylashtiradi;

 

— Mablag‘lar sotuvchiga o‘tkaziladi yoki so‘rovga ko‘ra naqd shaklda taqdim etiladi.

 

“Adliya vazirligi va banklar hamkorligida amalga oshiriladigan bu tizim aholi uchun hisob-kitoblarning shaffofligini va moliyaviy xavfsizlikni ta’minlashga qaratilgan”, deyiladi xabarda.