Mujtabo Xomanaiy AQSH–Isroil zarbalari vaqtida omon qolgan — The Telegraph
Ma’lum qilinishicha, u hujumdan biroz oldin uyidan chiqib ketgan.
Eronning yangi oliy rahbari Mujtabo Xomanaiy AQSH va Isroil tomonidan amalga oshirilgan aviazarbalar vaqtida omon qolgan. Bu haqda The Telegraph hujum vaqtida yozib olingan audioga tayanib xabar berdi.
Ma’lum qilinishicha, 28-fevral kuni Mujtabo Xomanaiy otasi Ali Xomanaiy bilan Tehrondagi majmuada bo‘lgan. Biroq zarbalar berilishidan sal oldin u hovliga chiqqan va hujum paytida binoda bo‘lmagan.
Hujum oqibatida Ali Xomanaiy, shuningdek, Eron xavfsizlik tizimiga mansub qator yuqori lavozimli shaxslar halok bo‘lgan. Ular orasida Islom inqilobi qo‘riqchilari korpusi rahbari Muhammad Pakpur hamda mudofaa vaziri Aziz Nasirzade borligi aytilgan.
The Telegraph Eronning sobiq rahbari idorasi protokol xizmati rahbari Mazohir Husayniyning yuqori martabali ruhoniylar va Islom inqilobi qo‘riqchilari korpusi qo‘mondonlariga qilgan murojaatining audioyozuvi borligini ma’lum qildi.
"Xudoning irodasi bilan Mujtabo hovliga chiqib, nimadir qilishiga to‘g‘ri keldi. Mujtabo tashqaridaligida dushman binoga raketa bilan zarba berdi", deyiladi audioyozuvda.
Husayniyning so‘zlariga ko‘ra, Mujtabo Xomanaiy zarba natijasida oyog‘idan yengil jarohat olgan. U bir vaqtning o‘zida majmuaning bir nechta obyektlariga zarba berilgani va hujum Xominaiy oilasini to‘liq yo‘q qilishga qaratilgani ta’kidlagan.
Mazkur audioyozuv Xomanaiyning sog‘lig‘i va mamlakatni boshqarish qobiliyati borasida savollar kuchaygan bir paytda tarqaldi. AQSH prezidenti Donald Tramp esa uning tirikligi yoki o‘lgani noma’lumligini bildirgan.
Ayrim eronlik rasmiylar esa oliy rahnamoning holati yuzasidan aniq ma’lumot mavjud emasligini ma’lum qilgan.
