Navbatdan tashqari attestatsiyadan o‘ta olmagan pedagoglar ishdan bo‘shatilishi aytilmoqda

Ijtimoiy tarmoqlarda navbatdan tashqari attestatsiya sinovlarida salbiy natija qayd etgan pedagoglar maktab rahbariyati tomonidan ishdan bo‘shatilishi mumkinligi haqidagi xabarlar yuzasidan rasmiy munosabat bildirildi.

 

Maktabgacha va maktab ta’limi vazirligi maktab rahbariyati yoki boshqa mansabdor shaxslarning pedagoglar oldiga ishdan bo‘shash kabi talablarni qo‘yishi qonunchilik talablariga mutlaqo zidligini bildirdi.

 

Rasmiy munosabatda qayd etilishicha, Vazirlar Mahkamasining 2021-yil 17-sentyabrdagi 572-son qarori bilan tasdiqlangan Nizomiga ko‘ra, navbatdan tashqari attestatsiyada qatnashgan va o‘ta olmagan pedagoglarning malaka toifasi tushirilmaydi hamda ularga amaldagi o‘z malaka toifasi bo‘yicha haq to‘lanishida davom etiladi. 

 

Shunday ekan navbatdan tashqari attestatsiyada yetarli ball to‘play olmagan pedagoglar bilan mehnat shartnomasining bekor qilinishi hech qanday qonuniy asosga ega emas.

 

“Amaldagi tartibga ko‘ra, faqatgina oliy ma’lumotga ega bo‘lmagan hamda mutaxassis lavozimidagi pedagoglar majburiy attestatsiya sinovlarida qatnashib undan o‘ta olmagan taqdirda, mehnat shartnomasi xodimning malakasi yetarli bo‘lmaganligi sababli bekor qilinishi mumkin. Bunda ish beruvchi xodim bilan tuzilgan mehnat shartnomasini bekor qilmagan taqdirda, mazkur pedagoglar navbatdan tashqari attestatsiyaga ko‘pi bilan ketma-ket ikki marta qatnashish huquqiga ega”, deyiladi vazirlik xabarida.

 

Shuningdek, xabarda mazkur imkoniyatlardan keyin ham pedagogning attestatsiya sinovlarida salbiy natija qayd etishi xodim bilan mehnat shartnomasining mehnat to‘g‘risidagi qonunchilik hujjatlarida belgilangan tartibda bekor qilinishiga asos bo‘lishi keltirilgan.

 

Shu bilan birga, yuqoridagi holatdan boshqa hech bir holatda pedagoglarning attestatsiya sinovlaridagi salbiy natija qayd etishi ularning mehnat shartnomasini bekor qilinishiga asos bo‘lmasligi ta'kidlangan.