O‘zbekiston Eronga insonparvarlik yordami yubordi

16-mart kuni O‘zbekiston Respublikasi Tashqi ishlar vazirligi xabariga ko‘ra, O‘zbekiston tomonidan Eron xalqiga insonparvarlik yordami yetkazildi.

 

Ma’lum qilinishicha, yordam tarkibidan un, guruch, shakar, makaron mahsulotlari, kungaboqar yog‘i va turli konservalar kabi oziq-ovqat mahsulotlari, shuningdek dori vositalari hamda tibbiy buyumlar o‘rin olgan. Bir nechta yuk mashinalarida jo‘natilgan insonparvarlik yuki allaqachon manzilga yetkazilgan.

 

Yuklarni Daragaz shahrida qabul qilib olish marosimida mahalliy hokimiyat vakillari, jumladan shahar hokimi Mujtaba Bazmara, shuningdek Eron Tashqi ishlar vazirligining Xuroson Razaviy viloyatidagi vakolatxonasi rahbari Ali Masumifar hamda Eronning Turkmanistondagi elchisi Ali Mujtaba ishtirok etgan.

 

Vazirlik yuklarning aniq hajmi va ularni yetkazishda qatnashgan O‘zbekiston tomoni vakillari haqida batafsil ma’lumot bermagan. Shu bilan birga, e’lon qilingan suratlarda O‘zbekistonning Turkmanistondagi elchisi sifatida faoliyat yuritgan Ravshanbek Alimovning insonparvarlik yuklarini topshirish jarayonida ishtirok etgani aks etgan.

 

Rasmiylar tadbir davomida Eron xalqiga ko‘rsatilgan yordam uchun O‘zbekiston rahbariyatiga minnatdorlik bildirgan. Ularning ta’kidlashicha, mazkur tashabbus ikki davlat o‘rtasidagi do‘stlik va o‘zaro qo‘llab-quvvatlash an’analarining ifodasi hisoblanadi.

 

Eslatib o‘tamiz, 28-fevral kuni AQSh va Isroil tomonidan Eronga qarshi harbiy harakatlar boshlangan edi. Eron esa javoban Isroil hamda AQShning mintaqadagi harbiy obyektlariga raketa va dronlar orqali zarbalar bergan. Uchinchi haftaga kirgan mojaro oqibatida 2 mingdan ortiq inson halok bo‘lgani, qurbonlarning aksariyati Eron va Livan hududlariga to‘g‘ri kelayotgani aytilmoqda.

 

Mazkur mojaro Yaqin Sharq mintaqasida beqarorlik kuchayishiga hamda global energiya bozorlarida narxlar o‘sishiga sabab bo‘lmoqda.