O‘zbekiston hududidagi gidroelektr stansiyalar soni 100 tadan oshdi
Gidroelektr stansiyalarda ishlab chiqarish quvvati 800 megavattga oshirilib, umumiy quvvat 2 400 megavattga yetkazildi.
16-mart kuni O‘zbekiston Respublikasi Prezident Administratsiyasi huzuridagi Ommaviy axborot vositalari uchun kontent tayyorlash markazida “O‘zbekgidroenergo” AJning 2025-yil asosiy natijalari va yangi istiqbolli loyihalari bo‘yicha matbuot anjumani o‘tkazildi.
Tadbirda Jamiyat boshqaruvi rahbariyati, ijro apparati departament, boshqarma va bo‘lim boshliqlari, mas’ul mutaxassislar, shuningdek, televideniye, radio, bosma va elektron OAV hamda xorijiy ommaviy axborot vositalari vakillari ishtirok etdi.
Ma’lum qilinishicha, Jamiyat tashkil etilgan vaqtida respublikada jami quvvati 1 604 megavatt bo‘lgan 36 ta gidroelektr stansiya faoliyat yuritar edi. So‘nggi yillarda amalga oshirilgan investitsiya loyihalari natijasida ishlab chiqarish quvvati 800 megavattga oshirilib, umumiy quvvat 2 400 megavattga yetkazildi.
Hozirgi kunda esa O‘zbekiston hududidagi gidroelektr stansiyalar soni 100 tadan oshdi.
