O‘zbekistonda kredit reklamalarida uni to‘lay olmaslik haqida ham ogohlantirish beriladi
Ushbu o‘zgarish aholining kredit xatarlariga oid xabardorligini oshirish va mas’uliyatli qarz olish madaniyatini shakllantirishga xizmat qiladi.
O‘zbekistonda kredit va mikroqarz reklamalarida qarzni o‘z vaqtida to‘lamaslik oqibatlari haqida majburiy ogohlantirish kiritish nazarda tutilgan qonun loyihasi 17-mart kuni Oliy Majlis Qonunchilik palatasi deputatlari tomonidan ikkinchi o‘qishda qabul qilindi.
Oliy Majlis Qonunchilik palatasining majlisida ta’kidlanishicha, hozirda mikroqarzlar reklamasida iste’molchilarning e’tibori asosan kreditni tez va oson olish imkoniyatiga qaratilmoqda. Biroq, bunday yondashuv kelgusida yuzaga kelishi mumkin bo‘lgan moliyaviy majburiyatlar va xatarlar haqida yetarli axborot bermaydi.
Qonun loyihasiga ko‘ra, “Reklama to‘g‘risida”gi qonunning 43-moddasiga o‘zgartirish kiritilib, kreditlar, jumladan mikroqarzlar reklamasida qarz majburiyatlarini bajarmaslik moliyaviy xatarlarni keltirib chiqarishi mumkinligi haqida ogohlantiruvchi matn joylashtirilishi majburiy etib belgilanmoqda. Ushbu ogohlantirish reklama maydoni yoki efir vaqtining kamida 10 foizini egallashi lozim.
Qonun tashabbuskorlari ushbu o‘zgarishlar moliyaviy xizmatlar reklamasini yanada tartibga solish, aholining kredit xatarlariga oid xabardorligini oshirish va mas’uliyatli qarz olish madaniyatini shakllantirishga xizmat qilishini ta’kidlamoqda.
Ayni paytda amaldagi qonunchilikka ko‘ra, moliyaviy xizmatlar reklamalari iste’molchilarning ishonchini suiiste’mol qilmasligi, ularning tajribasi va bilim yetishmasligidan foydalanishga qaratilmasligi hamda xizmatlarning muhim shartlarini ochib berishi shart.
