O'zbekistonda Xitoy o‘yinchoqlarida bolalar uchun xavf aniqlanib, savdodan chiqarilmoqda
O‘yinchoqlar bola so‘lagi va ter ta’siriga chidamsiz bo‘lib, ulardan zararli kimyoviy moddalar ajralib chiqishi mumkinligi aniqlandi.
O‘zbekistonning bir qator hududlaridagi savdo shoxobchalarida nazorat xaridlari o‘tkazilib, bolalar uchun mo‘ljallangan o‘yinchoqlar sinovdan o‘tkazildi. Bu haqda Texnik jihatdan tartibga solish sohasida nazorat inspeksiyasi xabar berdi.
Ma’lum qilinishicha, Qoraqalpog‘istondagi nazorat jarayonida Xitoyda ishlab chiqarilgan “BABY RATTLE TOYS” va “LOVLEY BABY” o‘yinchoqlari laboratoriya sinovlaridan o‘tkazildi. Xulosaga ko‘ra, ushbu mahsulotlar:
— mexanik zo‘riqishlarga chidamsiz;
— foydalanish jarayonida tez buziladi va iste’mol xususiyatlarini yo‘qotadi;
— bolalarning jarohatlanish xavfini oshiradi;
— dekorativ qoplamasi nam muhit, bola so‘lagi va ter ta’siriga chidamsiz bo‘lib, zararli kimyoviy moddalar ajralib chiqishi mumkin.
Shuningdek, Toshkent viloyatidagi nazorat xaridlarida “Malenkiy povar play the game” va “Yonuvchi o‘yinchoq” mahsulotlari tekshirilib, ularning mexanik chidamliligi pastligi, tez buzilishi va texnik reglament talablariga javob bermasligi aniqlangan.
Namangan viloyatida esa Xitoydan import qilingan “Crystal mud” slaym o‘yinchog‘ining sifatsizligi, tarkibida zararli elementlar miqdori yuqoriligi va yorlig‘idagi ma’lumotlarning yetarli emasligi qayd etilgan.
Xabarda aniqlangan kamchiliklar yuzasidan savdo subyektlariga ogohlantirishlar yuborilgani, xavfli mahsulotlar savdodan chiqarilib, ularning realizatsiyasi to‘xtatilgani ta'kidlangan.
