Prezident Mirziyoyev Ramazon hayiti va Navro‘z arafasida oʻz eshiklarini ochgan Islom sivilizatsiyasi markaziga tashrif buyurdi

Bugun Prezident Shavkat Mirziyoyev Toshkentdagi Islom sivilizatsiyasi markaziga tashrif buyurib, yangi ekspozitsiyalar, kutubxona, xalqaro ilmiy-ma’rifiy platforma va markaz infratuzilmasi bilan tanishdi.

 

Markaz Hazrati Imom majmuasi hududida 10 gektar maydonda qurilgan bo‘lib, uch qavatli bino va 42 ming kvadrat metr umumiy maydonga ega. Uning ichki maydonida 8 ming kvadrat metr ko‘rgazma zali, 550 o‘rinli anjumanlar zali, zamonaviy kutubxona va elektron resurslar mavjud. Bino qadimiy va milliy me’morchilik an’analari asosida loyihalashtirilgan bo‘lib, to‘rt asosiy portal orqali kirish mumkin, va tashqi ravoqlar Qur’on oyatlari hamda hadislar bilan bezatilgan.

 

Markaz fondida 60 dan ortiq nodir Qur’on qo‘lyozmalari, turli davrlarga mansub tarixiy va badiiy artefaktlar saqlanadi. Shu jumladan, somoniylar, qoraxoniylar, g‘aznaviylar, temuriylar va shayboniylar davriga oid qo‘lyozmalar va tangalar markaz ekspozitsiyasini boyitmoqda.

 

Kutubxonada 45 mingdan ortiq adabiyot mavjud bo‘lib, shundan 2 609 tasi nodir nashrlardan iborat. 350 mingta elektron resurs foydalanuvchilarga xizmat ko‘rsatadi. Maxsus xonalar va zamonaviy texnologiyalar imkoniyati cheklangan foydalanuvchilar, olimlar va talabalar uchun qulaylik yaratadi.

 

Raqamlashtirish, QR-kodlar va audio-video tizimlari orqali eksponatlar bo‘yicha interaktiv ma’lumotlar taqdim etilgan.

 

Markaz xalqaro standartlarga javob beradigan ilmiy va ma’naviy maskan sifatida faoliyat yuritadi. ICESCO, IRCICA, Oksford islom tadqiqotlari markazi, Temuriylar jamiyati va TURKSOY kabi xalqaro tashkilotlar bilan hamkorlik yo‘lga qo‘yilgan. Shu bilan birga, markazga xorijdan xarid qilingan yoki hadya etilgan tarixiy artefaktlar ham joylashtirilgan, ularning aksariyati xalqimiz tarixini o‘rganish va targ‘ib qilishga xizmat qiladi.

 

Tashrif davomida Prezident Mirziyoyev markazning Qur’on zaliga kirib, ma’naviy muhit va noyob ekspozitsiyalar bilan tanishdi. Gumbaz ostida koinot va yulduzlar tasviri namoyon qilinib, 90 dona “Swarovski” toshi va 650 dan ortiq chiroqlar ishlatilgan. Nodir qo‘lyozmalar orasida 1589-yilda xattot Sulton Muhammad tomonidan ko‘chirilgan “Bozuband” Qur’oni va XVII asr safaviylar davri qo‘lyozmalari alohida e’tiborga loyiq.

 

Prezident markaz kutubxonasi va ilmiy-platformasi faoliyatini yuqori baholab, u yurtimiz tarixini, madaniy merosini va islomiy qadriyatlarni kelajak avlodga yetkazishdagi rolini ta’kidladi. Tashrif yakunida davlat rahbari Islom sivilizatsiyasi markazining Faxriy mehmonlar kitobiga dastxat qoldirdi.

 

Islom sivilizatsiyasi markazi nafaqat O‘zbekistonda, balki xalqaro miqyosda ham e’tirof etilgan yirik ilmiy, ma’naviy va madaniy maskan sifatida faoliyat yuritmoqda. Markaz har kuni o‘rtacha 5 ming nafar tashrif buyuruvchini qabul qiladi va unda 400 dan ortiq xodim faoliyat olib boradi.