Prezident Shavkat Mirziyoyev Islom sivilizatsiyasi markazining rasmiy ochilish marosimida hamda iftorlikda ishtirok etib, nutq so‘zladi

Shavkat Mirziyoyev Oʻzbekistondagi Islom sivilizatsiyasi markazi ning rasmiy ochilish marosimi hamda iftorlik tadbirida ishtirok etib, nutq soʻzladi.

 

Tadbirga hududlardagi studiyalar orqali nuroniylar, olim-u ulamolar, keng jamoatchilik vakillari ulandi. Shuningdek, turli millat va diniy konfessiyalar vakillari, diplomatik korpus namoyandalari hamda xalqaro tashkilotlar vakillari marosimda qatnashdi.

 

Davlat rahbari tadbir avvalida butun xalqimizni muborak Ramazon oyi bilan yana bir bor samimiy tabriklab, yurtimizga tinchlik, baraka va farovonlik tiladi.

 

Taʼkidlanganidek, Ramazon oyi mehr-oqibat, saxovat va ezgulik fazilatlarini mustahkamlaydigan muqaddas davr hisoblanadi. Shu kunlarda davlat va nodavlat tashkilotlari, xayriya fondlari hamda saxovatli tadbirkorlar tomonidan kam taʼminlangan oilalar, nogironligi boʻlgan shaxslar va ijtimoiy yordamga muhtoj fuqarolarga keng koʻlamli yordam koʻrsatilayotgani qayd etildi.

 

Prezident hozirgi murakkab va tahlikali davrda tinchlikning naqadar ulugʻ neʼmat ekanini alohida taʼkidladi. Oʻzbekistonning 38 milliondan ziyod aholisi yagona xalq, ahil oila boʻlib yashayotgani mamlakatning eng katta boyligi ekani qayd etildi.

 

Shuningdek, bugungi kun xalqimiz hayotidagi muhim tarixiy voqea – Oʻzbekistondagi Islom sivilizatsiyasi markazining rasmiy ochilishi bilan ham ahamiyatli ekani taʼkidlandi. Davlatimiz rahbari ushbu majmua mamlakatimizning koʻp ming yillik boy tarixi va madaniy merosini aks ettiruvchi ulkan ilmiy-maʼrifiy maskan ekanini qayd etdi.

 

Markaz salkam 10 gektar hududda joylashgan boʻlib, majmuaning umumiy foydalanish maydoni 50 ming kvadrat metrni tashkil etadi. Unda “Oʻzbekiston zaminida islomgacha boʻlgan davr”, “Birinchi va Ikkinchi Renessans”, “Yangi Oʻzbekiston – Uchinchi Renessans poydevori” kabi ekspozitsiya zallari tashkil etilgan. Muzey ekspozitsiyasini boyitish maqsadida minglab tarixiy eksponatlar, jumladan qadimiy qoʻlyozmalar, arxeologik topilmalar va tarixiy xaritalar jamlangan.

 

Majmuaning asosiy zali – Qurʼon zalida dunyodagi eng qadimiy qoʻlyozmalardan biri boʻlgan muqaddas Usmon Musʼhafi alohida oʻrin egallagan. Shuningdek, turli davrlarga oid noyob Qurʼon qoʻlyozmalari ham namoyish etilmoqda.

 

Tadbir davomida Islom sivilizatsiyasi markazi nafaqat Oʻzbekiston, balki butun mintaqa uchun muhim ilmiy va maʼnaviy markaz boʻlishi taʼkidlandi. Bu yerda xalqaro tashkilotlar va ilmiy markazlar bilan hamkorlik asosida ilmiy tadqiqotlar olib borish, noyob qoʻlyozmalarni oʻrganish va jahon miqyosida targʻib qilish rejalashtirilgan.

 

Soʻz yakunida davlatimiz rahbari ushbu maskan yosh avlodni maʼrifat, ilm-fan va milliy qadriyatlarga hurmat ruhida tarbiyalaydigan muhim markaz boʻlib xizmat qilishiga ishonch bildirdi.

 

Tadbir yakunida iftorlik marosimi oʻtkazildi. Qurʼoni karim tilovat qilinib, muqaddas Ramazon oyida qilinayotgan ibodatlar qabul boʻlishi, xalqimiz va Vatanimiz tinchligi uchun duolar qilindi.