Soliq qarzdorligi 1 mln so‘mdan oshgan fuqarolarning elektr to‘lovi cheklanadi
Mazkur tizim tajriba tariqasida Namangan viloyatida joriy qilinadi.
16-apreldan boshlab Namangan viloyatida jismoniy shaxslarning mol-mulk va yer solig‘i bo‘yicha qarzdorligi 1 million so‘mdan oshgan taqdirda, elektr energiyasini to‘lash imkoniyati vaqtincha cheklanadi. Bu haqda Soliq qo‘mitasi xabar berdi.
Ma’lum qilinishicha, tizim tajriba tariqasida Namangan viloyatida amaliyotga tatbiq etiladi va “Soliq billing” avtomatlashtirilgan axborot tizimi orqali ishlaydi.
Qarzdor fuqarolar bir necha bosqichda ogohlantiriladi. Jumladan, avvalo soliq hisoblangani haqida xabarnoma, keyin SMS orqali eslatma yuboriladi. Agar fuqaro “Soliq” mobil ilovasidan foydalansa yoki my.gov.uz saytidagi shaxsiy kabineti mavjud bo‘lsa, xabar shu kanallar orqali ham yetkaziladi.
Shu bilan birga, SMS orqali elektr to‘lovi cheklanishi mumkinligi haqida ogohlantirish ham yuboriladi. Ushbu SMSdagi havola orqali soliq qarzdorligi qachon shakllangani va ogohlantirish qaysi bosqichda ekanini fuqaro kuzatib borishi mumkin.
Agar barcha ogohlantirishlarga qaramay qarzdorlik bartaraf etilmasa, fuqaroning elektr to‘lovi vaqtincha cheklanadi. Qarzdorlik yo‘q qilingach, cheklov darhol bekor qilinadi.
