Soxta xayriya orqali terrorizmni moliyalashtirish holatlari aniqlandi
Buxoroda fuqaro ijtimoiy tarmoqlar orqali xayriya mablag‘lari yig‘ib, ularni ekstremistik faoliyatni qo‘llab-quvvatlashga yo‘naltirgani fosh etildi.
So‘nggi vaqtlarda xayriya va ehson niqobi ostida terrorizmni moliyalashtirish holatlari kuzatilayotgani aniqlandi.
Ma’lum qilinishicha, Janubiy Koreyada o‘zbekistonlik shaxs soxta xayriya orqali 663 ming dollar mablag‘ yig‘ib, uning bir qismini xalqaro terroristik tashkilotlar — “Katiba at-tavhid val-jihod” va HAMASga o‘tkazgan.
Shuningdek, Buxoroda 1999-yilda tug‘ilgan shaxs ijtimoiy tarmoqlar orqali xayriya mablag‘lari yig‘ib, ularni ekstremistik faoliyatni qo‘llab-quvvatlashga yo‘naltirgani aniqlangan. Ushbu jarayonga uning otasi ham jalb etilgan.
Hozirda mazkur holat bo‘yicha bir necha shaxslarga nisbatan Jinoyat kodeksining 155-3-moddasi bilan jinoyat ishi qo‘zg‘atilib, tergov harakatlari olib borilmoqda. Ota sud hukmi bilan ozodlikdan mahrum etilgan, gumonlanuvchi o‘g‘ilga nisbatan esa qidiruv e’lon qilingan.
Mutaxassislar ta’kidlashicha, ayrim guruhlar internet orqali, jumladan, gumanitar yordam yoki ehson sifatida mablag‘ yig‘ib, ularni noqonuniy maqsadlarga yo‘naltirmoqda. Bunda yig‘ilgan mablag‘larning faqat kichik qismi xayriyaga sarflanib, qolgan qismi terrorchilik faoliyatini moliyalashtirishga yo‘naltirilishi mumkin.
Shu munosabat bilan fuqarolarga xayriya qilishda faqat rasmiy va ishonchli manbalardan foydalanish, mablag‘lar haqiqatan ham muhtojlarga yetib borishiga ishonch hosil qilish tavsiya etilmoqda.
