Toshkentda “Aqlli bekatlar” o‘rnatiladi
Yangi bekatlarda imkoniyati cheklangan fuqarolar uchun maxsus kutish joyi tashkil etiladi, yo‘lovchilar uchun qulayliklar kengaytiriladi.
Toshkent shahrida jamoat transporti tizimini zamonaviy va qulay qilish maqsadida “Aqlli bekatlar” o‘rnatish boshlanadi. Bu haqda Toshkent shahrida Yo‘l harakatini tashkil etish markazi xabar berdi.
Ma’lum qilinishicha, innovatsion bekatlarda xavfsizlik va qulaylik birinchi o‘rinda bo‘ladi. Imkoniyati cheklangan fuqarolar uchun maxsus kutish joyi tashkil etiladi.
Shuningdek, har bir bekat markazlashgan kuzatuv tizimiga ulangan 2 ta videokamera bilan jihozlanadi. Favqulodda holatlar uchun “SOS” tugmasi o‘rnatiladi.
Bundan tashqari bekatlarda avtobuslar harakat jadvalini ko‘rsatuvchi elektron monitorlar, tezkor xaridlar uchun vending qurilmalari ham o‘rnatiladi.
