Toshkentda FVB xodimi olgan porasini qaytarayotgan paytda ushlandi
Xodim xususiy klinikaning yong‘inga qarshi holati bo‘yicha ijobiy xulosa berishni va’da qilib, 6,5 million so‘m olgan.
Toshkent shahrida Favqulodda vaziyatlar bosh boshqarmasi Yunusobod tuman bo‘limi Favqulodda vaziyatlar profilaktikasi bo‘limi inspektori MChJ rahbaridan 6,5 million so‘m olganligi aniqlandi. Bu haqda Zamon.uz’ga DXX xabar berdi.
Ma’lum qilinishicha, inspektor Olmazor tumanidagi xususiy klinikaning yong‘inga qarshi holati bo‘yicha vakolatli hamkasblari orqali ijobiy xulosa berishni va’da qilgan, ammo so‘ngra turli bahonalar bilan va’dasini bajarmagan.
Fuqarolar pulni qaytarishni talab qilganidan so‘ng, Davlat xavfsizlik xizmati va Prokuratura organlari hamkorligida tezkor tadbir o‘tkazilgan. Inspektor oldindan olgan pulni qaytarayotgan vaqtida ashyoviy dalillar bilan ushlandi.
Hozirda unga nisbatan jinoiy ish qo‘zg‘atilgan va “qamoq” ehtiyot chorasi qo‘llanilgan. Tergov jarayonlari davom etmoqda.
