Afg‘onistondan olib kirilgan 4,5 kg gashishning savdosi to‘xtatildi

Farg‘ona va Navoiy viloyatlarida giyohvandlik vositalari noqonuniy aylanmasiga qarshi qaratilgan tezkor tadbirlar natijasida bir qator shaxslar qo‘lga olindi. Bu haqda DXX Zamon.uz'ga ma'lum qildi.

 

Davlat xavfsizlik xizmati xodimlari tomonidan Surxondaryo va Farg‘ona viloyatlari bo‘yicha boshqarmalar hamkorligida Farg‘ona shahrida o‘tkazilgan tadbirda 1989-yilda tug‘ilgan mahalliy fuqaro tekshiruvdan o‘tkazildi. Uning sumkasi xolislar ishtirokida ko‘zdan kechirilganda, umumiy og‘irligi 4 kg 463 gramm bo‘lgan “gashish” moddasi aniqlanib, ashyoviy dalil sifatida olindi.

 

Tergov davomida mazkur jinoyatga aloqador bo‘lgan uning 1990-yilda tug‘ilgan ukasi ham qo‘lga olindi. U avval ham giyohvandlik vositalari bilan bog‘liq jinoyat uchun sudlangani ma’lum bo‘ldi. 

 

Dastlabki ma’lumotlarga ko‘ra, aka-ukalar ushbu moddani Afg‘onistondan kontrabanda yo‘li bilan olib kirib, Farg‘ona viloyati hududida sotishni rejalashtirgan.

 

Holat yuzasidan ularga nisbatan Jinoyat kodeksining 246-moddasi 2-qismi hamda 25, 273-moddalari 5-qismi bilan jinoyat ishi qo‘zg‘atilib, “qamoq” ehtiyot chorasi qo‘llanildi.

 

Shuningdek, Navoiy shahrida 2000-yilda tug‘ilgan fuqaro to‘xtatilib tekshirildi. Uning yonidan 8 ta ampulada gashish moyi hamda folga qog‘ozga o‘ralgan 10 dona gashish moddasi topildi.

 

Tezkor tadbir davomida uning yashash manzili ko‘zdan kechirilganda, xonadonda narkolaboratoriya tashkil etilgani aniqlandi. Manzildan 34 dona izolentaga o‘ralgan gashish, 63 ta ampulada 88 gramm gashish moyi, 2 ta shpritsda 25 milligramm gashish moyi, shuningdek 640 gramm gashish moyi va 2 gramm qo‘lbola usulda tayyorlangan gashish dalil sifatida olindi. 

 

Mazkur holat yuzasidan gumonlanuvchiga nisbatan Jinoyat kodeksining 273-moddasi 4-qismi “b” bandi bilan jinoyat ishi qo‘zg‘atilib, unga nisbatan “qamoq” ehtiyot chorasi qo‘llanildi.