Davlat grantida o‘qigan bitiruvchilar uchun majburiy ishlab berishning yangi tartibi joriy qilinishi mumkin
Bitiruvchilarning majburiy ishlab berish muddati ta’lim yo‘nalishi xususiyatidan kelib chiqib alohida belgilanadi.
O‘zbekistonda davlat granti asosida oliy ta’limni tamomlagan bitiruvchilar uchun amalda bo‘lgan kamida uch yil ishlab berish talabi bekor qilinishi mumkin. Bu bo‘yicha “Kadrlarni davlat grantlari asosida maqsadli tayyorlash tartibi to‘g‘risida nizomni tasdiqlash haqida”gi qarorga o‘zgartirish kiritish taklifi jamoatchilik muhokamasiga qo‘yildi.
Amaldagi tartibga ko‘ra, 2005-yildan buyon davlat granti asosida bakalavriat va magistraturada tahsil olgan bitiruvchilar kamida uch yil ishlab berishi shart qilib belgilangan.
Yangi taklifga muvofiq, ushbu qat’iy muddat bekor qilinib, bitiruvchilarning majburiy ishlab berish muddati ta’lim yo‘nalishi xususiyatidan kelib chiqib alohida belgilanadi. Bu vakolat Oliy ta’lim, fan va innovatsiyalar vazirligiga berilishi ko‘zda tutilgan. Shuningdek, hujjatda “kamida uch yil” iborasini “majburiy” so‘zi bilan almashtirish taklif etilmoqda.
Bundan tashqari, nizomga qator texnik o‘zgartirishlar ham kiritilishi rejalashtirilgan. Jumladan, bitiruvchilarni ishga taqsimlashda qo‘llaniladigan “doimiy yashash joyi” atamasini “yashash joyi” bilan almashtirish nazarda tutilgan.
Mazkur hujjat loyihasi jamoatchilik muhokamasi uchun 26-martga qadar ochiq bo‘ladi. Qaror tasdiqlangan taqdirda, u rasmiy e’lon qilingan kundan e’tiboran kuchga kiradi.
