“Issiqlik elektr stansiyalari” AJ ESG reytingini qo‘lga kiritdi
Kompaniya xalqaro Sustainable Fitch agentligi tomonidan baholanib, 50 balllik ko‘rsatkichni qayd etgan.
O‘zbekistonda energetika sohasida barqaror rivojlanish tamoyillarini joriy etish doirasida “Issiqlik elektr stansiyalari” aksiyadorlik jamiyati ilk bor ESG reytingini oldi. Bu haqda “Issiqlik elektr stansiyalari” AJ matbuot xizmati xabar berdi.
Ma’lum qilinishicha, kompaniya 2026-yil birinchi choragida xalqaro Sustainable Fitch agentligi tomonidan baholanib, 50 balllik ko‘rsatkichni qayd etgan. Bu natija jamiyatda barqaror rivojlanish bo‘yicha institutsional asoslar shakllanganini ko‘rsatadi.
So‘nggi yillarda korxonada ESG (ekologik, ijtimoiy va korporativ boshqaruv) yo‘nalishida tizimli islohotlar amalga oshirildi. Xususan, 2025-yil davomida kompaniya faoliyati tahlil qilinib, 2026–2030-yillarga mo‘ljallangan ESG rivojlanish yo‘l xaritasi ishlab chiqildi.
Shu bilan birga, korxonada ekologik ma’lumotlar bazasi takomillashtirildi hamda xalqaro GHG Protocol metodologiyasi asosida issiqxona gazlari tashlamalari muntazam hisoblab borilmoqda. Bu esa iqlim xavflarini samarali boshqarish va energiya samaradorligini oshirishga xizmat qilayotgani qayd etilmoqda.
2024-yil yakunlari bo‘yicha esa jamiyat tarixida ilk bor Barqaror rivojlanish hisoboti tayyorlandi. U xalqaro GRI va SASB standartlari asosida ishlab chiqilgan bo‘lib, kompaniya faoliyati shaffofligini oshirishga xizmat qilgan.
Shuningdek, ESG tizimini mustahkamlash maqsadida normativ baza takomillashtirildi, barqaror rivojlanish ko‘rsatkichlarini monitoring qilish va ma’lumotlarni oshkor etish mexanizmlari joriy etildi.
Kompaniya yaqin istiqbolda iqlim strategiyasini ishlab chiqishni rejalashtirmoqda. Unda chiqindilarni kamaytirish, energiya samaradorligini oshirish va kam uglerodli texnologiyalarni joriy etish bo‘yicha uzoq muddatli maqsadlar belgilanadi.
Mutaxassislar fikricha, mazkur chora-tadbirlar energetika sohasini modernizatsiya qilish, investorlar ishonchini mustahkamlash hamda O‘zbekistonning “yashil” iqtisodiyotga o‘tish jarayonini qo‘llab-quvvatlashda muhim ahamiyat kasb etadi.
