O‘zbekiston Afg‘onistonga insonparvarlik yordami yubordi
Ramazon hayiti munosabati bilan yetkazilgan mazkur yordam Hayratonda mamlakat vakillariga topshirildi.
O‘zbekiston Respublikasi nomidan Afg‘oniston xalqiga insonparvarlik yordami yetkazildi. Bu haqda O‘zbekiston TIV xabar berdi.
Qayd etilishicha, mazkur tashabbus Ramazon hayiti munosabati bilan afg‘on xalqini qo‘llab-quvvatlash hamda ikki mamlakat o‘rtasidagi yaqin qo‘shnichilik va do‘stona munosabatlarni yanada mustahkamlash maqsadida amalga oshirilgan.
Insonparvarlik yordamining umumiy og‘irligi 290 tonnadan ziyod bo‘lib, un, guruch, bug‘doy, o‘simlik yog‘i, tez tayyorlanadigan oziq-ovqat mahsulotlari, makaron, qandolat va boshqa turdagi mahsulotlardan iborat.
Ushbu yordam Hayratonda Afg‘oniston vakillariga topshirilgan.
Vazirlik xabariga ko‘ra, marosimda so‘zga chiqqan Balx viloyati gubernatori o‘rinbosari Mavlaviy Abu Idris, Tashqi ishlar vazirligining Balx viloyati bo‘linmasi rahbariyati, shuningdek, Hayraton shahar hokimligi vakillari O‘zbekiston Respublikasi Prezidenti Shavkat Mirziyoyevga afg‘on xalqiga doimiy ko‘rsatib kelinayotgan e’tibor, g‘amxo‘rlik, amaliy qo‘llab-quvvatlash va birdamlik uchun samimiy minnatdorlik bildirgan.
Shuningdek, tadbirda O‘zbekistonning Afg‘onistondagi Favqulodda va Muxtor Elchisi Oybek Usmanov hamda Surxondaryo viloyati hokimi Ulug‘bek Qosimov ishtirok etgan.
Eslatib o‘tamiz, avvalroq O‘zbekiston hozirda mojarolar markazida qolgan Eronga ham insonparvarlik yordamini jo‘natgan edi.
