Prezident Samarqanddagi tashrifini Yoshlar kreativ parkidan boshladi
Shuningdek, davlat rahbari nemis tilini o'qitish markazida bo'ldi va ekofaollar bilan ham suhbatlashdi.
18-mart kuni O‘zbekiston Respublikasi Prezidenti Shavkat Mirziyoyev Samarqandga tashrif buyurdi. Davlat rahbari viloyatdagi tashrifini Samarqand shahridagi Yoshlar kreativ parkini ko‘zdan kechirish bilan boshladi.
Ma’lum qilinishicha, Prezident Shavkat Mirziyoyev tashabbusi bilan amalga oshirilayotgan “Yashil makon” umummilliy loyihasi doirasida viloyatda har yili 16 million tupdan ortiq daraxt ko‘chatlari ekilmoqda. Bahorgi mavsumda ham 6,3 million tup mevali va manzarali daraxt, buta ko‘chatlari o‘tqazish rejalashtirilib, ayni paytda viloyatning barcha hududlarida bu jarayon davom etmoqda.
Shuningdek, O‘zbekiston ko‘chasida joylashgan sobiq harbiy gospital o‘rnidagi 5,4 gektar maydonda ham 70 milliard so‘mdan ortiq homiylik mablag‘lari hisobidan Yoshlar kreativ shaharchasi va jamoat bog‘i tashkil etilgan.
“Bu yerda madaniy meros obyektlari ro‘yxatiga olingan 5 ta bino va inshoot bo‘lib, endilikda ulardan yoshlar uchun zamonaviy va raqamli kutubxona, ko‘p tarmoqli o‘quv markazi, kreativ to‘garaklar, sun’iy intellekt, 3D modellashtirish, robototexnika va kibersport o‘yinlari markazlari sifatida foydalaniladi. Axborot-resurs markazi, sport zallari, yer osti ekomuzeyi tashkil etildi”, deyiladi xabarda.
Xabarga ko‘ra, viloyat shaxmat federatsiyasi ham yangi bog‘da joylashgan bo‘lib, federatsiya tomonidan bu yerda o‘quv-mashg‘ulot yig‘inlari, musobaqalar o‘tkazish imkoniyati mavjud.
Bog‘da bolalar attraksionlari, fitness zallari, stol tennis zali, tennis kortlari, vorkaut va mini golf maydonlari barpo etilgan. Hududda Nuroniylar maskani, o‘ndan ortiq ayvonchalar qurilgan.
Shu bilan birga Prezident “Profi deutsch” nemis tilini o‘qitish va imtihon markazi faoliyati bilan tanishdi.
Markazda yoshlar nemis tilini o‘rganib, xalqaro “Telc” sertifikatini oladi. Sertifikat sohiblari Germaniyada dual kasbiy ta’limda o‘qishini davom ettiradi, bandligi ta’minlanadi. Joriy yilda bunday imtihon markazini mamlakatimizning yana beshta hududida ochish rejalashtirilgan.
Bundan tashqari Shavkat Mirziyoyevga “Muhammad al-Xorazmiy vorislari” loyihasi bo‘yicha qilinayotgan ishlar haqida ham ma’lumot berildi. Loyiha doirasida 8-11-sinf o‘quvchilariga raqamli texnologiyalar va xorijiy tillar chuqur o‘rgatiladi. O‘quvni muvaffaqiyatli yakunlaganlarga maxsus sertifikat beriladi.
Tashrid davomida “Aloqa bank” va Milliy bank konsultativ markazining tadbirkorlik faoliyatini boshlayotgan yoshlarga imtiyozli kredit ajratish, startap loyihalarini qo‘llab-quvvatlash bo‘yicha ishlari, Yoshlar ishlari ishlari agentligining “Ibrat farzandlari”, “Mutolaa”, “Qizlar akademiyasi” loyihalari bilan tanishildi.
Davlat rahbari yoshlar bilan muloqot qildi, ularning loyihalari bilan tanishdi. Jumladan, “Zamin” xalqaro jamoat fondi tomonidan amalga oshirilayotgan “Eco-schools Uzbekistan” loyihasida ishtirok etayotgan yosh ekofaollar 2026 yil uchun rejalari haqida so‘zlab berdilar.
“Yangi O‘zbekistonda yuqori texnologiyali ishlab chiqarish korxonalarni barpo etyapmiz, yuqori daromadli ish joylari ochilyapti. Biz buni sizlarga – bilimli yoshlarga ishonib qilyapmiz. Buning uchun har daqiqangiz kelajagingiz uchun xizmat qilsin, do‘stingiz kitob bo‘lsin. Biror bilimni chuqur egallash va to‘g‘ri yo‘lni topish uchun insonga diqqat, sabr-toqat, ishtiyoq kerak. Mana shu ishtiyoqingiz so‘nmasin. Sizlar berayotgan takliflar bizning islohotlarimiz g‘oyasiga mos, men har qanday taklif va tashabbuslaringizni qo‘llab-quvvatlashga tayyorman, – dedi Prezident.
