Prezident Shavkat Mirziyoyev Ramazon hayitini nishonlash to‘g‘risidagi qarorni imzoladi
Turizm qo‘mitasi va Transport vazirligi Ramazon kunlarida ziyoratgohlar va tarixiy obidalarga qulay tashrif sharoitini yaratadi.
Prezident Shavkat Mirziyoyev 18-mart kuni “Muborak Ramazon hayitini nishonlash to‘g‘risida”gi qarorni imzoladi. Qarorga muvofiq, 2026-yil 20-mart kuni Ramazon hayiti bayrami sifatida keng nishonlanadi.
Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari, Din ishlari bo‘yicha qo‘mita, O‘zbekiston mahallalari uyushmasi, Ijtimoiy himoya milliy agentligi va boshqa hamkor tashkilotlar bilan birgalikda bayram tadbirlarini xalqimizning milliy an’ana va urf-odatlariga hamda Navro‘z umumxalq bayramiga uyg‘un holda ko‘tarinki ruhda o‘tkazish, iftorlik va xayriya tadbirlarini tashkil etish vazifasi yuklatildi.
Shuningdek, Turizm qo‘mitasi va Transport vazirligi Ramazon kunlarida yurtdoshlarimiz uchun muqaddas ziyoratgohlar va tarixiy obidalarga qulay tashrif imkoniyatlarini yaratadi.
O‘zbekiston Milliy teleradiokompaniyasi, Milliy axborot agentligi va boshqa OAVlar bayram tadbirlarini keng yoritishi tavsiya qilindi.
Qarorning ijrosi O‘zbekiston Respublikasi Bosh vaziri Abdulla Aripov va Prezident maslahatchisi S.U. Umurzakov nazoratiga yuklatildi.
