Prezident Shavkat Mirziyoyev Samarqand viloyatidagi loyihalarni ishga tushirdi va yangilarining qurilishini boshlab berdi
Shahar va tumanlarda 106 ta yangi loyiha ishga tushirish va qurilishga tayyorligi ma’lum qilindi.
Prezident Shavkat Mirziyoyev viloyatga tashrifi doirasida hududdagi yirik loyihalarni ishga tushirish va yangi obyektlar qurilishini boshlashga bag‘ishlangan tadbirda ishtirok etdi.
Marosim doirasida viloyatda oziq-ovqat, yengil sanoat, kimyo va farmatsevtika, qurilish materiallari, metall va mebel sanoati mahsulotlari ko‘rgazmasi tashkil etildi. Davlat rahbari zamonaviy ishlab chiqarish quvvatlari, ilg‘or texnika va texnologiyalar bilan tanishdi.
Samarqand viloyati mamlakat iqtisodiyotida strategik o‘ringa ega bo‘lib, so‘nggi yillarda sanoat hajmi izchil oshmoqda. Mahalliy va xorijiy sarmoyalarni jalb etish uchun qulay ishbilarmonlik va investitsiya muhiti yaratilgan.
Marosimda ma’lum qilinishicha, shahar va tumanlarda qariyb 7 milliard dollarlik investitsiya hisobiga 106 ta yangi loyiha ishga tushirish va qurilishga tayyor. Loyihalar tog‘-kon sanoati, qurilish materiallari, avtosanoat, kimyo sanoati, elektrotexnika, qishloq xo‘jaligi, ta’lim, sog‘liqni saqlash, xizmat ko‘rsatish va turizm sohalarini qamrab oladi.
Prezident loyihalar ijrochilari va kompaniya vakillari bilan suhbatlashib, ularning taklif va tashabbuslarini tingladi. Ushbu loyihalar viloyat sanoatini rivojlantirish, ishlab chiqarish tarmoqlarini modernizatsiya qilish va barqaror iqtisodiy o‘sishni ta’minlashda muhim omil sifatida baholandi.
Tadbir yakunida davlat rahbari ramziy tugmani bosib, Samarqand viloyatidagi yirik loyihalarni ishga tushirish va yangi obyektlar qurilishini rasmiy ravishda boshladi.
Xabarga ko‘ra, Avstriya, Xitoy, BAA, Turkiya, Hindiston va Rossiya bilan hamkorlikda 2,4 milliard dollarlik 53 ta loyiha ishga tushirildi. Shu bilan birga, Niderlandiya, Yaponiya, Janubiy Koreya, Xitoy, BAA, Turkiya, Rossiya va Eron bilan hamkorlikda 4,6 milliard dollarlik 53 ta loyiha bo‘yicha qurilish ishlari boshlandi.
“Ushbu loyihalarning amalga oshirilishi hisobiga 18 mingta yangi ish o‘rni yaratish, 13 trillion so‘mlik sanoat mahsulotlarini ishlab chiqarish va buning natijasida 700 million dollarlik eksport salohiyatini ta’minlash imkoniyati paydo bo‘ladi. Bu esa viloyat sanoatini diversifikatsiya qilish, zamonaviy ishlab chiqarish zanjirlarini kengaytirish va eksport geografiyasini yanada oshirishga xizmat qiladi”, deyiladi xabarda.
