Ramazon oyining 29 kun bo‘lishi tabiiy holat — Fatvo markazi
Bu Oy harakatiga asoslangan hijriy-qamariy taqvim bilan bogʻliq va ro‘za savobiga ta’sir qilmaydi.
O‘zbekiston musulmonlari idorasi Fatvo markazi ma’lumotiga ko‘ra, Ramazon oyining ayrim yillarda 29 kun davom etishi tabiiy holat bo‘lib, hijriy-qamariy taqvimning xususiyati bilan bog‘liq.
Qayd etilishicha, hijriy-qamariy taqvim Oy harakatiga asoslangan bo‘lib, yangi hilol ko‘ringanidan keyingi kun yangi oyning birinchi kuni hisoblanadi. Shu sababli qamariy oylar 29 yoki 30 kundan iborat bo‘ladi, yil esa 354 yoki 355 kunni tashkil etadi.
Mutaxassislar ta’kidicha, ramazonning 29 yoki 30 kun bo‘lishi uning savobiga ta’sir qilmaydi va to‘liq oy hisoblanadi.
Payg‘ambar Muhammad (sollallohu alayhi vasallam) Madinada to‘qqiz yil ramazon ro‘zasini tutgan bo‘lib, ularning aksariyatida ro‘za 29 kun, ayrim yillarda esa 30 kun davom etgan.
Eslatib o‘tamiz, O‘zbekistonda Ramazon hayiti 20-mart kuni nishonlanadi, bu Prezident Shavkat Mirziyoyevning “Muborak Ramazon hayitini nishonlash to‘g‘risida”gi qarorida belgilangan.
