Samarqandda 43 ming gektar maydonda yaylov tashkil qilinadi
Samarqand viloyatida yaylovlar, chorvachilik va turizmni rivojlantirish bo‘yicha yangi vazifalar belgilandi.
Shavkat Mirziyoyev raisligida o‘tkazilgan yig‘ilishda global iqtisodiy beqarorlik sharoitida hududlar oldida turgan ustuvor vazifalar muhokama qilindi.
Davlat rahbari dunyodagi notinchliklar oqibatida logistika zanjirlarining uzilishi, neft narxi va transport xarajatlarining oshishi oziq-ovqat narxlariga bevosita ta’sir ko‘rsatayotganini ta’kidladi. Shu bilan birga, xalqaro turizm bozorida qariyb 100 million sayyoh xavfsiz va barqaror yo‘nalishlarni izlayotgani qayd etildi.
Shu nuqtayi nazardan, hudud rahbarlari oldiga oziq-ovqat ishlab chiqarishni kengaytirish, turizm va xizmat ko‘rsatish sohalaridagi imkoniyatlardan to‘liq foydalanish vazifasi qo‘yildi.
Yig‘ilishda chorvachilikni rivojlantirish masalalariga alohida e’tibor qaratildi. Xususan, viloyatda uzoq yillardan buyon foydalanib kelinayotgan 250 ming gektar yaylov yerlarini chorvadorlarga to‘g‘ridan-to‘g‘ri ijaraga berish tartibi davom ettirilishi belgilandi. Mazkur ijaraning muddati yana bir yilga uzaytiriladi.
Shuningdek, viloyatda 52 ming gektar yaylovdan foydalanayotgan 150 nafar chorvador hamda naslli qo‘y-echki boqish istagini bildirgan tadbirkorlarni qo‘llab-quvvatlash choralari ko‘rib chiqildi. Endilikda yaylov ijarasidan tushadigan mablag‘lar to‘liq yaylov xo‘jaliklarining o‘zida qoldiriladi.
Aholining chorvani uy sharoitida boqib, mavsumiy ravishda dalaga olib chiqish amaliyoti mavjudligi, biroq yaylovlar maydoni qisqarib borayotgani ham qayd etildi. Shu sababli viloyatning to‘rtta tumanida jami 43 ming gektar maydonda jamoat yaylovlari tashkil etilib, ular mahallalarga 30 yil muddatga bepul ijaraga beriladi.
Yaylov infratuzilmasini yaxshilash maqsadida quduqlar qazish, suv chiqarish, urug‘ ekish hamda degradatsiyaga uchragan yerlarni tiklash ishlari uchun 50 milliard so‘m ajratilishi belgilandi.
Chorvachilikda naslchilikni rivojlantirish uchun laboratoriya uskunalari va naslli qoramol xaridiga 10 yil muddatga yillik 12 foizli kredit ajratish rejalashtirilgan.
Bundan tashqari, Samarqand viloyatida parrandachilik sohasini rivojlantirish, xususan, parranda genetikasi maktabini shakllantirish zarurligi ta’kidlandi. Bu yo‘nalishda Bulung‘ur tumanida 50 million dollarlik go‘sht yo‘nalishidagi naslchilik majmuasi, Qo‘shrabot tumanida esa 20 million dollarlik tuxum yo‘nalishidagi korxona tashkil etilishi rejalashtirilmoqda.
