Samarqandda xorijdan olib kelingan 38 kilogrammga yaqin narkotik moddalar musodara qilindi
Shuningdek, xususiy avtomashina garajiga yashirilgan 9,04 kg opiy ekstraksiyasi aniqlangan.
Samarqanddagi tezkor tadbirda kontrabanda yo‘li bilan olib kelinayotgan katta miqdordagi narkotiklar to‘xtatib qolindi. Bu haqda DXX xabar berdi.
Ma’lumotlarga ko‘ra, kuzatuv ostida bo‘lgan Urgut tumanida yashovchi 1989 va 1992-yilda tug‘ilgan 3 nafar fuqaro Tojikiston Respublikasining Panjikent tumaniga borib, narkosavdogarlardan umumiy og‘irligi 14,766 kg “opiy” va 14,958 kg “gashish” moddalarini olib, davlat chegarasini qoidabuzarlik bilan O‘zbekiston hududiga olib o‘tgan vaqtlarida qo‘lga olingan.
Qonunbuzarlarga nisbatan Jinoyat kodeksining 246-moddasi 2-qismi va 273-moddasi 5-qismi bo‘yicha jinoyat ishi qo‘zg‘atildi va ularga nisbatan “qamoq” ehtiyot chorasi qo‘llangan.
Bundan tashqari, Samarqand shahridagi “Orzu” MFY hududidagi xususiy avtomashina garaji ham tekshirilganda maxsus tayyorlangan xufiya joydan marmar toshlar orasiga yashirilgan 9,04 kg opiy ekstraksiyasi aniqlangan.
Qayd etilishicha Jinoyat kodeksining 246-moddasi 2-qismi va 273-moddasi 5-qismi bilan ish qo‘zg‘atilib, garaj egasini qo‘lga olish choralari ko‘rilmoqda.
Mazkur jinoyatlar uchun qonunchilikda 20 yilgacha ozodlikdan mahrum qilish jazosi belgilangan.
