Surxondaryoda qarz mojarosi ortidan IIB xodimlari va fuqarolar to‘qnashuvi bo‘lgani aytilmoqda

Ijtimoiy tarmoqlarda “Surxondaryoda qarzdorlik mojarosi: ichki ishlar xodimlari va fuqarolar to‘qnashuvi” nomi bilan tarqalgan videolavha yuzasidan rasmiy munosabat bildirildi.

 

Ma’lum qilinishicha, 2-fevral kuni Muzrabot tumani “Mehnatobod” mahallasida yashovchi R.R. ismli ayolning uyiga 6 nafar erkak kelib, qarzga berilgan pullarini talab qilib, manzilda janjal chiqarishgan hamda jamoat tartibi va fuqarolarning tinchligini buzishgan. Ayol O‘zbekiston Respublikasi JKning 168-moddasi bilan ayblanuvchi deb topilgan.

 

Chaqiruv asosida voqea joyiga yetib borgan profilaktika inspektorlari tomonidan janjal qilayotgan fuqarolar bilan tushuntirish ishlari olib borilgan. 

 

Holatni rasmiylashtirish maqsadida fuqarolarni tuman IIBga olib ketish jarayonida, ulardan biri bo‘lgan Ch.X. xodimlarga keskin qarshilik ko‘rsatib, profilaktika inspektori kapitan R. Choriyevning yuz qismiga boshi bilan zarba bergan. Javobgarlikdan qutulish maqsadida, Ch.X. o‘zini hushini yo‘qotganday ko‘rsatib olgan.

 

Ch.X. kasalxonaga olib borilib, sog‘lig‘ini tekshirish jarayonida, uning farzandi 2008-yilda tug‘ilgan M.X. yetib kelib, profilaktika inspektori mayor E.Azamovga to‘satdan xujum qilgan vaqtida, xodim tomonidan jismoniy kuch ishlatib, to‘xtatilgan.

 

Hozirda holat yuzasidan Muzrabot tuman prokuraturasi tomonidan O‘zbekiston Respublikasi JKning 219-moddasi 2-qismi bilan jinoyat ishi qo‘zg‘atilib, fuqaro Ch.X.ga nisbatan qamoq tarzidagi ehtiyot chorasi qo‘llanilgan, uning voyaga yetmagan o‘g‘li M.X.ga nisbatan qonunchilikka muvofiq tilxat ehtiyot chorasi belgilangan.

 

Ichki ishlar organlari xodimlarining qonuniy talablarini bajarmaslik yoki ularga qarshilik ko‘rsatish qonunchilikka muvofiq javobgarlikka sabab bo‘lishi haqida ogohlantiramiz.