Telegram bir kun ichida 100 mingdan ortiq guruh va kanallarni blokladi
2026-yil boshidan buyon bloklangan guruh va kanallar soni 10 milliondan oshdi.
Telegram messenjeri bir kun ichida 100 mingdan ortiq guruh va kanallarni blokladi. Bu haqda RIA Novosti tomonidan tahlil qilingan platforma statistikasi ma’lumotlarida qayd etilgan.
Ma’lumotlarga ko‘ra, seshanba kuni yakuniga kelib messenjer jami 114 348 ta guruh va kanalni bloklagan. Bu 10-martdan beri bir kunda qayd etilgan eng yuqori bloklash ko‘rsatkichlaridan biri bo‘ldi. O‘sha kuni 102 612 ta guruh va kanal bloklangan edi.
Statistikaga ko‘ra, mart oyi boshidan buyon messenjer jami 1 547 231 ta guruh va kanalni bloklagan. Shu davrda 9 439 ta hamjamiyat “terrorizmga aloqador” kontent sabab yopilgan.
2026-yil boshidan beri bloklangan guruhlar va kanallarning umumiy soni 10 186 435 taga yetgan. Shundan 41 619 tasi “terrorizmga aloqador” deb baholangan hamjamiyatlardir.
Telegram ma’lumotiga ko‘ra, platformadagi moderatsiya jarayoni 2015-yildan buyon foydalanuvchilarning shikoyatlari hamda mashinaviy o‘rganishga asoslangan proaktiv monitoring tizimi orqali amalga oshiriladi. 2024-yil boshidan esa ushbu jarayon sun’iy intellektga asoslangan moderatsiya vositalari bilan yanada kuchaytirilgan.
