Toshkentda qalbaki hujjatlar orqali ijara uylarni sotgan jinoiy guruh aniqlandi

O'zbekiston hududlarida o‘tkazilayotgan “Xavfsiz va sog‘lom yurt” keng qamrovli profilaktik tadbirlari doirasida Toshkent shahrida firibgarlik bilan shug‘ullangan jinoiy guruh fosh etildi. Bu haqda IIV xabar berdi.

 

Ma’lum qilinishicha, call-markaz ishonch telefonlariga kelib tushgan tezkor ma’lumot asosida Ichki ishlar vazirligi Tezkor qidiruv departamenti xodimlari tomonidan tezkor tadbir o‘tkazilgan. Natijada besh nafar shaxsdan iborat guruh ijaraga olingan uylarni qalbaki hujjatlar orqali boshqa fuqarolarga sotib kelgani aniqlangan.

 

Tergovga ko‘ra, 1992-yilda tug‘ilgan shaxs muqaddam Jinoyat kodeksining 168 (firibgarlik), 169 (o‘g‘rilik) va 228-moddalari (hujjatlarni qalbakilashtirish) bilan sudlangan bo‘lishiga qaramay, jinoiy faoliyatini davom ettirgan. U yana to‘rt nafar — 1980, 1997, 1994 va 2000-yillarda tug‘ilgan shaxslarni o‘ziga sherik qilgan.

 

Guruh a’zolari Toshkent shahrida fuqarolarga tegishli uylarni ijaraga olib, uy egasidan yashirin ravishda hujjatlarni soxtalashtirgan holda ularni boshqa shaxslarga sotish bilan shug‘ullanib kelgan.

 

Tezkor tadbir davomida ular Mirobod tumanidagi Nukus ko‘chasida joylashgan, umumiy maydoni 95 kvadrat metr bo‘lgan xonadonni har kvadrat metri 1300 AQSh dollaridan sotish bo‘yicha kelishuvga erishgan. Keyinchalik Yakkasaroy tumanidagi notarial idorada oldi-sotdi hujjatlarini rasmiylashtirish jarayonida 110 ming AQSh dollari miqdoridagi pulni olayotgan vaqtida daliliy ashyolar bilan qo‘lga olingan.

 

Mazkur holat yuzasidan gumonlanuvchilarga nisbatan Jinoyat kodeksining 168-moddasi 4-qismi bilan jinoyat ishi qo‘zg‘atilib, ularga nisbatan qamoq ehtiyot chorasi qo‘llangan.