Afg‘onistonda bir yil ichida OAVga bosimning 200 dan ortiq holati qayd etildi
Bu ko‘rsatkich o‘tgan yilga nisbatan 20 foizdan ortiq oshgan.
Afg‘onistonda 2025-yilda ommaviy axborot vositalari erkinligini buzish va jurnalistlarga nisbatan zo‘ravonlik bilan bog‘liq 207 ta holat qayd etildi. Bu haqda Tolo news Afg‘oniston Jurnalistlar Markazining yillik hisobotiga tayanib xabar bermoqda.
Hisobot mamlakatda nishonlanadigan Milliy jurnalistlar kuni munosabati bilan e’lon qilingan. Unda Afg‘onistondagi so‘z erkinligi va jurnalistlar faoliyati bilan bog‘liq vaziyat tahlil qilingan.
Markaz ma’lumotlariga ko‘ra, qayd etilgan holatlar orasida ikki nafar jurnalistning o‘ldirilishi, yana bir jurnalistning jarohatlanishi, OAV vakillari va tahririyat xodimlariga nisbatan 183 ta tahdid, shuningdek jurnalistlar hamda OAV faollarining hibsga olinishi bilan bog‘liq 21 ta holat mavjud.
Hisobotda ta’kidlanishicha, 2024-yilga nisbatan bunday hodisalar soni 20 foizdan ortiq oshgan.
