AQSh davlat qarzi tarixda ilk bor 39 trillion dollardan oshdi
Bu har bir amerikalik hisobiga o‘rtacha 114 ming dollardan ortiq qarz to‘g‘ri kelmoqda.
AQSh davlat qarzi tarixda ilk bor 39 trillion dollardan oshdi. Bu haqda TASS agentligi AQSh Moliya vazirligi ma’lumotlariga tayanib xabar berdi.
Ma'lum qilinishicha, AQShning umumiy davlat qarzi hozirda 39,03 trillion dollarni tashkil etmoqda. Bu har bir fuqaro hisobiga o‘rtacha 114 ming dollardan ortiq qarz to‘g‘ri kelishini anglatadi. Mazkur ko‘rsatkich mamlakat tarixidagi eng yuqori daraja hisoblanadi.
Ma’lumotlarga ko‘ra, 2025-yil oktabr oyida AQSh davlat qarzi ilk bor 38 trillion dollardan oshgan edi.
Mutaxassislar prognoziga ko‘ra, kelgusi o‘n yil ichida AQShning davlat qarzi mamlakat yalpi ichki mahsulotining taxminan 120 foiziga yetishi mumkin. Bu esa federal hukumat qarzi butun iqtisodiyotning yillik ishlab chiqarish hajmidan ham ortib ketishini anglatadi.
Shuningdek, Vashington har yili davlat qarzi bo‘yicha foiz to‘lovlariga qariyb 970 milliard dollar sarflamoqda. Bu ko‘rsatkich ayrim hisob-kitoblarga ko‘ra harbiy xarajatlardan ham yuqori bo‘lib, 2020-yildan buyon uch baravarga oshgan.
Mutaxassislarning ta’kidlashicha, qarzning yuqori darajasi federal hukumatni foiz to‘lovlariga ko‘proq mablag‘ ajratishga majbur qiladi. Bu esa infratuzilma, ta’lim, sog‘liqni saqlash va ijtimoiy dasturlar uchun ajratiladigan mablag‘larning qisqarishiga olib kelishi mumkin.
Mutaxassislarning fikricha, federal byudjet siyosatini qayta ko‘rib chiqish va ortiqcha xarajatlarni qisqartirish orqali AQSh byudjetini o‘n yil ichida muvozanatlashtirish imkoniyati mavjud.
