Hayit va Navroʻz kunlari xavfsizlikni ta’minlash uchun 20 mingdan ortiq xodim safarbar etiladi

Ichki ishlar vazirligi Ramazon hayiti va Navroʻz bayramlari munosabati bilan mamlakat bo‘ylab jamoat tartibi va fuqarolar xavfsizligini ta’minlash maqsadida keng ko‘lamli xavfsizlik choralarini joriy etmoqda.

 

Vazirlik ma’lumotiga ko‘ra, bayram tadbirlari davomida respublika bo‘ylab 20 mingdan ortiq huquqni muhofaza qilish organlari xodimlari xizmatga jalb etiladi.

 

Mamlakatdagi 2000 dan ortiq masjidlarda o‘tkaziladigan hayit namozlari hamda yuzlab hududlarda tashkil etiladigan ommaviy bayram tadbirlari maxsus nazorat ostida o‘tkaziladi.

 

Asosiy ommaviy tadbirlar respublika bo‘ylab 200 dan ortiq hududda tashkil etilishi rejalashtirilgan. Hayit namozi o‘qiladigan masjidlarda namozxonlar oqimini tartibga solish, jamoat tartibini saqlash va qo‘shimcha xavfsizlik choralarini ta’minlash bo‘yicha zarur tashkiliy ishlar olib boriladi.

 

Yo‘l harakati xavfsizligi va transport logistikasiga ham alohida e’tibor qaratilmoqda. Tadbirlar o‘tkaziladigan hududlar, yo‘llar va yirik bozorlar atrofida qariyb 2500 nafar yo‘l harakati xavfsizligi xodimlari navbatchilik qiladi. Ommaviy tadbirlar o‘tkaziladigan joylarda maxsus to‘siqlar o‘rnatilib, 150 metr radiusgacha bo‘lgan hududlarda transport vositalari uchun vaqtinchalik to‘xtash joylari tashkil etiladi.

 

Fuqarolarga qo‘shimcha qulaylik yaratish maqsadida yirik tadbir o‘tkaziladigan hududlarda yo‘qolgan bolalarni vaqtincha joylashtirish uchun maxsus xonalar tashkil etiladi. Ushbu maskanlarda huquqni muhofaza qiluvchi xodimlar hamda psixologlar faoliyat yuritib, ota-onalarni tezkor aniqlash va bolalarni o‘z yaqinlariga yetkazish bo‘yicha yordam ko‘rsatadi.

 

Shuningdek, sayyohlar oqimi yuqori bo‘lishi kutilayotgan Boʻstonliq tumani, Parkent tumani, Zomin tumani hamda Shahrisabz tumani hududlarida ham xavfsizlik choralarini kuchaytirish bo‘yicha qo‘shimcha tadbirlar amalga oshirilmoqda.

 

Bundan tashqari, elektr energiyasi, gaz va suv ta’minoti xizmatlari kuchaytirilgan ish rejimiga o‘tkazilgan. Ichki ishlar organlarining 24 soatlik maxsus guruhlari bayram kunlarida jamoat tartibi va fuqarolar xavfsizligini ta’minlash maqsadida vaziyatni doimiy nazorat qilib boradi.