IIQK Isroildagi 80 ta harbiy obyektga raketa zarbalari yo'lladi

Eron Islom inqilobi qo‘riqchilari korpusi (IIQK) Isroildagi 80 ta harbiy nishonga raketa zarbalarini yo‘naltirganini ma’lum qildi. Bu haqda RIA Novosti xabar bermoqda.

 

Ma’lum qilinishicha, “Haqiqiy va’daning 4-bosqichi” nomli zarbalarning 63- to‘lqini doirasida Isroilning janubiy va markaziy hududlaridagi, jumladan, Rishon-le-Sion shahriga yaqin joylashgan, shuningdek, Tel-Avivning sharqiy va janubiy hududlaridagi harbiy obyektlar raketa tizimlari va dronlar orqali aniq nishonga olingan.

 

Tun davomida ham  IIQK Kuvayt, BAA va Bahrayndagi AQSH bazalariga ham hujum qilgan.

 

Bundan tashqari Eron Saudiya Arabistoni va Qatardagi neft-gaz infratuzilmasiga kuchli zarbalar berdi.

 

Zarbalardan biri dunyodagi eng yirik suyultirilgan tabiiy gaz markazlaridan biri hisoblanuvchi Qatarning Ras-Laffan portiga berilgan.

 

Saudiya Arabistoni ham Ar-Riyod tomon uchirilgan to‘rtta ballistik raketa va shaharning sharqidagi gaz inshootiga yo‘naltirikgan dron to‘xtatib, yo‘q qilganini aytdi.

 

Shuningdek, avvalroq Isroil dunyodagi eng yirik gaz resursining bir qismi va Eron energiya ta’minotining ustunlaridan biri bo‘lgan mamlakatdagi Janubiy Pars tabiiy gaz koniga hujum qilgan.

 

Qo‘shma Shtatlar prezidenti Donald Tramp mazkur hujum kelishilmaganini aytib, Isroilning qayta ushbu konga zarba bermasligini bildirdi.

 

“Eron Qatarga hujum qilishga qaror qilmasa, Isroil tomonidan ushbu o‘ta muhim va qimmatli Janubiy Pars koniga boshqa hujumlar qilinmaydi”, — dedi Tramp.

 

Avvalroq Eron Ali Larijoniyning oldirilganiga javoban Isroilga zarbalarning 61-to‘lqinini yo'llagan edi.