O‘zbekiston mobil raqamlari xorijiy saytlarda onlayn sotilayotgani aytilmoqda
Raqamli texnologiyalar vazirligi bunga munosabat bildirdi.
Ijtimoiy tarmoqlarda O‘zbekistonning mobil raqamlari xalqaro va norasmiy onlayn-servislarda sotilayotgani aks etgan skrinshotlar tarqaldi. Holat yuzasida Raqamli texnologiyalar vazirligi munosabat bildirdi.
Vazirlik bayonotida ko‘rsatilgan virtual raqamlardan telefon raqamlari sifatida foydalanib bo‘lmasligi ma’lum qilingan.
Xabarda qayd etilishicha, bunday raqamlar orqali internet xizmatlaridan ham foydalanish imkoni yo‘q.
“Shu bilan birga, fuqarolarning shaxsga doir ma’lumotlarini noqonuniy qo‘lga kiritish imkoni mavjud emasligi sababli vahimaga o‘rin yo‘q”, deyiladi vazirlik bayonotida.
Vazirlik ma’lumotlariga ko‘ra, xalqaro va norasmiy onlayn-servislarda AQSh, Kanada, Buyuk Britaniya, BAA, Portugaliya, Vyetnam va boshqa davlatlar virtual raqamlari ham mavjud. Bunday servislardan olingan virtual raqamlardan ijtimoiy tarmoqlar, elektron pochtalar yoki boshqa platformalarda ro‘yxatdan o‘tish uchun faqat bir martalik maxsus kod orqali qisqa muddatga foydalanish mumkin.
“Axborot texnologiyalari yordamida sodir etiladigan jinoyatlarga qarshi kurashni kuchaytirish maqsadida barcha mobil aloqa operatorlari tarmoqlarida raqamlarni soxtalashtirish holatlarini aniqlash va oldini olish tizimi joriy etilib, doimiy ravishda takomillashtirilmoqda”, — deya qo‘shimcha qildi vazirlik.
Shuningdek, vazirlik aholiga my.gov.uz portalidagi “Mening raqamlarim” xizmatidan foydalanib, o‘z nomiga rasmiylashtirilgan mobil raqamlarini kuzatib borish mumkinligini eslatdi.
