O‘zbekistonda davlat idoralarida qog‘ozdan foydalanish qisqartiriladi
Xodimlar soni va ish hajmidan kelib chiqib, qog‘oz sarfiga cheklov joriy etiladi.
O‘zbekistonda davlat organlari faoliyatida qog‘ozdan foydalanishni qisqartirish va ish jarayonlarini raqamlashtirishga qaratilgan hukumat qarori qabul qilindi. Bu haqda Adliya vazirligining “Huquqiy axborot” Telegram-kanali xabar berdi.
Qarorga ko‘ra, 2026-yil 1-iyungacha davlat idoralarida ishlatilgan qog‘ozlarni yig‘ish uchun maxsus konteynerlar o‘rnatilib, ularni qayta ishlash korxonalariga yetkazish tizimi yo‘lga qo‘yiladi.
Shuningdek, har bir bo‘linmada xodimlar soni va ish hajmidan kelib chiqib, qog‘oz sarfiga cheklov joriy etiladi.
2026-yil 1-maydan boshlab esa respublika va mahalliy ijro etuvchi hokimiyat organlarida qog‘oz, siyoh, printer va nusxa ko‘chirish uskunalarini xarid qilish xarajatlari keyingi 5 yil davomida har yili 15 foizga kamaytirib boriladi.
Bundan tashqari, printerlardan markazlashgan holda foydalanish tizimi joriy etilib, ochiq ofislarda har 20 nafar xodim uchun bitta printer ajratiladi.
Shu bilan birga, har oyda bir marta “qog‘ozsiz kun” ekologik aksiyasi o‘tkaziladi.
