O‘zbekistonning uchta hududda minglab kontrafakt va yaroqsiz dori vositalari fosh etildi
Hozirda tergovga qadar tekshiruv ishlari olib borilmoqda
Namangan, Qashqadaryo va Samarqandda sifat kafolatiga ega bo‘lmagan va kontrafakt dori vositalari muomalasiga chek qo‘yildi. Bu haqda Zamon.uz’ga DXX ma’lum qildi.
Ma’lum qilinishicha, Kosonsoy tumanida yashovchi uch nafar fuqaro tomonidan mahalliy mahallalar hududida tashkil etilgan uchta “yashirin ombor” fosh etildi. U yerda jami 723 turdagi 57 mingdan ortiq xorijda ishlab chiqarilgan, sifat sertifikatiga ega bo‘lmagan hamda ayrimlarining yaroqlilik muddati o‘tgan dori vositalari saqlangani aniqlandi. Barcha mahsulotlar protsessual tartibda olib qo‘yildi.
Shuningdek, Qarshi tumanida 1965-yilda tug‘ilgan shaxs o‘z uyida litsenziyasiz dorixona tashkil etgani ma’lum bo‘ldi. U yerda 82 turdagi 1500 dan ortiq hujjatsiz dori vositalari noqonuniy ravishda sotilayotgani qayd etildi.
Samarqand shahrida esa ijaraga olingan omborxonada 225 turdagi 14 mingdan ziyod iste’molga yaroqsiz dori vositalari sotish maqsadida saqlanayotgani fosh qilindi.
Hozirda barcha holatlar yuzasidan olib qo‘yilgan dori vositalari ekspertizaga yuborilgan bo‘lib, tergovga qadar tekshiruv ishlari olib borilmoqda.
