Prezident farmoni bilan 392 nafar mahkum afv etildi
Afv etilganlar orasida 3 nafar xorij fuqarosi, 26 nafar ayol, 166 nafar yoshlar hamda 24 nafar taqiqlangan tashkilotlar faoliyatida ishtirok etgan shaxslar bor.
Shavkat Mirziyoyev tomonidan Ramazon hayiti va Navro‘z bayrami arafasida bir guruh mahkumlarni afv etish to‘g‘risidagi farmon imzolandi. Bu haqda O‘zA xabar berdi.
Farmon O‘zbekiston Respublikasi Prezidenti tomonidan amalga oshirilayotgan insonparvarlik siyosati doirasida qabul qilingan bo‘lib, unga muvofiq 392 nafar shaxs afv etildi.
Ma’lum qilinishicha, afv etilganlarning 223 nafari jazodan to‘liq ozod etilgan, 82 nafari muddatidan oldin shartli ravishda ozod qilingan.
Shuningdek, 34 nafar shaxsning jazosi yengilroq turiga almashtirilgan, 53 nafar mahkumning jazo muddati qisqartirilgan.
Afv etilganlar orasida 3 nafar chet el fuqarosi, 26 nafar ayol, 14 nafar 60 yoshdan oshgan shaxslar, 166 nafar yoshlar hamda 24 nafar taqiqlangan tashkilotlar faoliyatida ishtirok etganlar bor.
Mas’ul idoralarga afv etilgan shaxslarni jamiyatga moslashtirish, ularni ish bilan ta’minlash va sog‘lom turmush tarziga qaytarish bo‘yicha tegishli topshiriqlar berilgan.
