Rossiyada patent tizimi bekor qilinishi mumkin

 

Rossiyada mehnat migrantlari faoliyatini tartibga solishga qaratilgan yangi takliflar ilgari surildi. Sergey Mironov migrantlarga mamlakat hududida faqat rotatsiya (smenali) asosida ishlashga ruxsat berishni taklif qildi.

 

Adolatli Rossiya partiyasi yetakchisining TASS agentligiga ma’lum qilishicha, amaldagi patent tizimini bekor qilib, xorijiy fuqarolarni ishga jalb qilish bo‘yicha aniq va qat’iy qoidalarni joriy etish zarur.

 

Mironovning ta’kidlashicha, xorijiy ishchilar Rossiyaga faqat aniq bir ish beruvchi bilan tuzilgan yangi mehnat shartnomasi asosida kelishi kerak. Unga ko‘ra, migrantlar boshqa tashkilotlarga o‘tishi yoki boshqa hududlarga ko‘chib ishlashi cheklanishi lozim.

 

Shuningdek, siyosatchi xorijiy fuqarolarga Rossiyaga oila a’zolarisiz kelishga ruxsat berilishi kerakligini bildirib, agar qonun buzilsa, migrant bilan birga uning oilasi ham mamlakatdan chiqarilishi mumkinligini ta’kidlagan.

 

Mironov migrantlar oqimini kamaytirish maqsadida “ommaviy import” amaliyotini to‘xtatish zarurligini ham qayd etdi.

 

Ayni paytda Rossiya Davlat Dumasi 18-mart kuni migrantlar uchun qo‘shimcha talablarni nazarda tutuvchi hukumat qonun loyihasini birinchi o‘qishda qabul qildi. Ushbu tashabbus migrantlarning daromadlarini nazorat qilish, shuningdek vaqtinchalik yashash ruxsatnomasi va doimiy yashash ruxsatnomalarini bekor qilish asoslarini kengaytirishni ham o‘z ichiga oladi.