“Sabrimizning chegarasi bor”: Saudiya Arabistoni Eronni ogohlantirdi
Vazir Saudiya va uning ittifoqchilari zarur bo‘lsa, Eronga qarshi hujumga tayyorligini bildirdi.
Saudiya Arabistoni tashqi ishlar vaziri Faysal bin Farhon Ol Saud Eronni Fors ko‘rfazi davlatlariga qarshi hujumlarni to‘xtatishga chaqirib, mintaqa mamlakatlarining sabri cheklanganini aytdi. Bu haqda Al Jazeera xabar berdi.
Vazirning ta’kidlashicha, Eron tomonidan amalga oshirilayotgan zarbalar oldindan puxta rejalashtirilgan bo‘lib, Saudiya va uning ittifoqchilari zarur bo‘lsa, kuchli harbiy salohiyatidan foydalanishga tayyor.
U qaysi holatda javob berilishi haqida aniq ma’lumot bermadi. Biroq Tehron buni jiddiy ogohlantirish sifatida qabul qilishi kerakligini qayd etdi.
Mazkur bayonot Saudiya poytaxtida arab va islom davlatlari tashqi ishlar vazirlari ishtirokida o‘tkazilgan yig‘ilishdan so‘ng yangradi. Unda mintaqadagi urushning kengayib borayotgani va xavfsizlikka tahdidlar muhokama qilindi.
Avvalroq Eron Fors ko‘rfazidagi energetika obyektlariga, jumladan, Ras Laffan sanoat shaharchasi hamda BAAning gaz infratuzilmalariga zarba bergani haqida xabarlar tarqalgan edi.
Islom inqilobi qo‘riqchilari korpusi bu hujumlarni Isroilning Janubiy Pars gaz koniga qilgan zarbasiga javob sifatida izohlagan.
Saudiya tomoni, shuningdek, havo hujumidan mudofaa tizimlari orqali Eron tomonidan uchirilgan raketalar yo‘q qilinganini ma’lum qilgan.
Rasmiylarga ko‘ra, hatto urush yakunlangan taqdirda ham Eron bilan munosabatlarni tiklash uzoq vaqt talab etadi. Saudiya tashqi ishlar vaziri ishonch deyarli butunlay yo‘qolganini bildirib, Tehronni vaziyatni keskinlashtirmasdan, zudlik bilan o‘z siyosatini qayta ko‘rib chiqishga chaqirdi.
