Toshkentda isitish mavsumi 24-martdan yakunlanadi
Ob-havo sharoiti va issiqlik ta’minoti tizimlarining faoliyati doimiy kuzatib boriladi hamda zarurat tug‘ilganda tezkor chora ko‘riladi.
Toshkentda barqaror iliq bahor ob-havosi kuzatilayotgani sababli isitish mavsumi bosqichma-bosqich yakunlanadi. Bu haqda Toshkent shahar hokimligi xabar berdi.
Ma’lum qilinishicha, isitish mavsumini yakunlash 24-martdan boshlanishi rejalashtirilgan bo‘lib, u bosqichma-bosqich amalga oshiriladi. Bunday yondashuv turar joy binolarida haroratning keskin o‘zgarishiga yo‘l qo‘ymaydi hamda muhandislik tizimlarining barqaror ishlashini ta’minlaydi.
Aholi uchun qulaylik yaratish maqsadida kelgusi bayram kunlari issiqlik ta’minoti saqlab qolinadi.
Xabarga ko‘ra, bu qaror kommunal infratuzilmaga tushadigan yuklamani kamaytirish va resurslardan oqilona foydalanishni ta’minlashga ham xizmat qiladi. Aholi bayram kunlarini xavfsiz va qulay oila davrasida o‘tkazishi uchun barcha choralar ko‘rilgan.
Shu bilan birga, ob-havo sharoiti va issiqlik ta’minoti tizimlarining faoliyati doimiy kuzatib boriladi hamda zarurat tug‘ilganda tezkor chora ko‘rish uchun shay holat ta’minlanadi.
