Toshkentdan Chorvoqqa mavsumiy avtobus qatnovi yo‘lga qo‘yiladi
Qatnovlar har kuni soat 06:00 dan boshlanib, 1,5 soat interval bilan amalga oshiriladi.
2026-yil 23-martdan boshlab Toshkent - Chorvoq yo‘nalishida avtobus qatnovi ishga tushiriladi. Bu haqda “Toshshahartransxizmat” xabar berdi.
Mazkur yo‘nalish Mashinasozlar metrosidan Chorvoq (Humson qo‘rg‘oni)gacha qatnovni ta’minlaydi.
Ma’lum qilinishicha, yo‘nalishga zamonaviy MAN RR3 rusumidagi 47 o‘rindiqli, konditsionerli avtobuslar biriktiriladi. Yo‘l kira narxi 25 ming so‘m etib belgilangan.
Qatnovlar har kuni soat 06:00 dan boshlanib, 1,5 soat interval bilan amalga oshiriladi. Yo‘l davomiyligi o‘rtacha 1 soat 30 daqiqani tashkil etadi. So‘nggi reys Chorvoqdan soat 20:30 da yo‘lga chiqib, soat 22:00 da poytaxtga yetib keladi.
Avtobuslar Humson qo‘rg‘onigacha Maxtumquli ko‘chasi, Yangi O‘zbekiston bog‘i, Xojikent va Chinorkent orqali harakatlanadi.
To‘lovni naqd pulda ham, bank kartalari orqali ham amalga oshirish mumkin.
