AQShning Eronga qarshi operatsiyasi xarajatlari 25 milliard dollardan oshdi
Oq uy avvalroq operatsiya qiymatini 12 milliard dollar deb baholagan edi.
AQShning Eronga qarshi olib borayotgan harbiy operatsiyasi uchun sarflangan xarajatlar 25 milliard dollardan oshgani ma’lum qilindi.
Harbiy xarajatlarni kuzatib boruvchi ixtisoslashgan onlayn platforma — Iran War Cost Tracker tomonidan e’lon qilingan yangilangan ma’lumotlarga ko‘ra, AQShning ushbu harbiy kampaniyasi uchun sarflangan umumiy mablag‘ allaqachon 25 milliard dollardan ortgan.
Portal mualliflari hisob-kitoblar Pentagon tomonidan AQSh Kongressiga taqdim etilgan rasmiy hisobotlarga asoslanganini ta’kidlagan. Mazkur hujjatlarga ko‘ra, jangovar harakatlarning dastlabki olti kunining o‘zi AQSh byudjetiga taxminan 11,3 milliard dollarga tushgan.
Shuningdek, portal hisob-kitoblariga ko‘ra, operatsiyani davom ettirish uchun kunlik xarajatlar o‘rtacha 1 milliard dollarni tashkil etmoqda. Natijada real vaqt rejimidagi hisoblagich harbiy kampaniya AQSh soliq to‘lovchilariga har soniyada qariyb 11,5 ming dollarga tushayotganini ko‘rsatmoqda.
Avvalroq Oq uy Milliy iqtisodiy kengashi raisi boshqa raqamlarni keltirgan edi. Uning ma’lum qilishicha, 16-mart holatiga ko‘ra Eron operatsiyasining umumiy qiymati 12 milliard dollar atrofida bo‘lgan.
Eslatib o‘tamiz, 28-fevral kuni AQSh va Isroil tomonidan Eronga qarshi keng ko‘lamli harbiy operatsiya boshlangan edi. Hujumlar davomida mamlakatning yirik shaharlari, jumladan Tehron ham nishonga olingan.
