Qirgʻizistonlik qori Qurʼon tilovati boʻyicha yana jahon chempioni bo‘ldi
Tanlovda dunyoning turli mamlakatlaridan minglab ishtirokchilar qatnashib, finalga 64 nafar qori yetib borgan.
Qirgʻizistonlik Qurʼon qorisi Muhammadali Qori Umarov xalqaro Qurʼon tilovati musobaqasida yana bir bor birinchi oʻrinni qoʻlga kiritdi. Bu haqda Qirgʻiziston musulmonlari diniy boshqarmasi matbuot xizmati maʼlum qildi.
Maʼlum qilinishicha, tanlov 17-mart kuni Jidda shahrida, Saudiya Arabistoni hududida oʻtkazilgan. Musobaqa yakuniga koʻra, Muhammadali Qori Umarov birinchi oʻrinni egallab, 50 ming Saudiya riali (taxminan 13 ming AQSh dollari) miqdoridagi mukofot bilan taqdirlandi.
Tanlovda dunyoning turli mamlakatlaridan oʻn mingga yaqin ishtirokchi qatnashish uchun ariza topshirgan. Ulardan 2 ming nafari saralab olinib, musobaqada qatnashgan. Sakkiz kun davom etgan bahslar natijasida 64 nafar ishtirokchi final bosqichiga yoʻl olgan.
Musobaqaning asosiy talablari Qurʼonni toʻliq yod olish hamda tajvid qoidalariga qatʼiy amal qilgan holda qiroat qilishdan iborat bo‘lgan. Yakuniy natijalarga ko‘ra sovrinli o‘rinlar quyidagicha taqsimlangan:
1-o‘rin — Qirgʻiziston
2-o‘rin — AQSh
3-o‘rin — Misr
4-o‘rin — Suriya
5-o‘rin — Shvetsiya
Gʻolib o‘z chiqishida yana bir bor xalqaro miqyosda birinchi oʻrinni qoʻlga kiritganidan mamnunligini bildirib, u erishilgan natijada Qirgʻiziston xalqining qoʻllab-quvvatlashi va duolari katta ahamiyatga ega bo‘lganini qayd etgan.
Maʼlumot uchun, Muhammadali Qori Umarov hozirda Madina Islom universiteti Qurʼon fakultetining toʻrtinchi kurs talabasi hisoblanadi.
Avvalroq, 2022-yil 22-sentabr kuni Makka shahrida 111 mamlakat vakillari ishtirok etgan Butunjahon Qurʼon tilovati va tafsiri musobaqasida ham u gʻoliblikni qoʻlga kiritib, 250 ming rial mukofotga sazovor bo‘lgan edi.
