Sadir Japarov va Qamchibek Tashiyev hayit namozini ado etdi
Sobiq Milliy xavfsizlik qo‘mitasi raisi Tashiyev noto‘g‘ri xatti-harakatlari uchun uzr so‘radi.
Qirg‘iziston Prezidenti Sadir Japarov va Milliy xavfsizlik qo‘mitasi sobiq raisi Qamchibek Tashiyev 20-mart kuni hayit namozini ado etdilar. Bu haqda Prezident matbuot xizmati ma’lum qildi.
Sadir Japarov Bishkek shahridagi Eski maydonda 30 mingdan ortiq odam ishtirok etgan namozni o‘tkazdi. Maydon atrofida jamoat tartibini ta’minlash maqsadida militsiya xodimlari va shifokorlar navbatchilik qilgan. Prezident tabrigida Ramazon oyining ma’naviy ahamiyati ta’kidlandi va dunyo bo‘ylab tinchlik va barqarorlik o‘rnatilishiga umid bildirildi.
Qamchibek Tashiyev esa “Jal” mikrorayonida o‘tkazilgan hayit namozida ishtirok etdi. Ijtimoiy tarmoqlarda tarqalgan videolarda uning yonida O‘sh shahrining sobiq meri Jenishbek Toktorbayev ham ko‘ringan. Namozdan so‘ng Tashiyev barcha aholini Ramazon hayiti bilan tabriklagan va noto‘g‘ri xatti-harakatlar qilgan boʻlsa uzr so‘rashini bildirgan.
Eslatib o‘tamiz, 10-fevral kuni Qamchibek Tashiyev Qirg‘iziston Milliy xavfsizlik davlat qo‘mitasi raisi lavozimidan ozod qilingan edi.
