AQSh Eron hududiga qo‘shin kiritishga tayyorgarlik ko‘rmoqda — CBS News
Manbalarga ko‘ra, harbiylar ehtimoliy operatsiya vaqtida Eron askarlarini qo‘lga olish va ularni qayerga joylashtirish masalalarini ham muhokama qilgan.
Pentagon AQSh quruqlik qo‘shinlarini Eronga yuborish uchun tayyorgarlik ko‘rmoqda. Bu haqda CBS News manbalarga tayanib xabar berdi.
Manbalarning bildirishicha, harbiy qo‘mondonlar Prezident Donald Tramp ko‘rib chiqayotgan ehtimoliy qarorlar uchun aniq takliflar tayyorlagan. Trampning o‘zi ham bu masalani muhokama qilgan, biroq qanday sharoitda qo‘shin yuborilishi hozircha noma’lum.
Payshanba kuni u jurnalistlarga: “Men hech qayerga qo‘shin yubormayman, agar yuborsam ham, bu haqda aytmagan bo‘lardim”, — degan.
AQSh Markaziy qo‘mondonligi bu boradagi savollarni Oq uy va Pentagonga yo‘naltirdi.
Oq uy matbuot kotibi Kerolayn Levittning aytishicha, Pentagon prezident uchun turli variantlarni tayyorlaydi, ammo bu hali qaror qabul qilinganini anglatmaydi. Hozircha qo‘shin yuborish rejalashtirilmagan.
Manbalarga ko‘ra, harbiylar ehtimoliy operatsiya vaqtida Eron askarlarini qo‘lga olish va ularni qayerga joylashtirish masalalarini ham muhokama qilgan.
Shu bilan birga, AQSh 82-havo-desant diviziyasining ayrim qismlarini Yaqin Sharqqa yuborishga tayyorgarlik ko‘rmoqda. Rejalarda tezkor harbiy kuchlar va dengiz piyodalari bo‘linmalari ham bor.
“Hozirda minglab dengiz piyodalari mintaqaga yo‘naltirilmoqda. Hafta boshida Kaliforniyadan uchta harbiy kema va taxminan 2 200 nafar harbiy jo‘nab ketgan. Bu urush boshlanganidan beri yuborilgan ikkinchi shunday bo‘linma bo‘lib, yetib borishi bir necha hafta vaqt oladi”, deyiladi xabarda.
