Eron zarbalari AQSh harbiy bazalariga 800 mln dollar zarar yetkazdi — BBC

BBC tahliliga ko‘ra, Eron tomonidan Yaqin Sharqdagi AQSh harbiy bazalariga berilgan zarbalar dastlabki 14 kunlik harbiy harakatlar davomida taxminan 800 million dollar miqdorida zarar yetkazgan.

 

Hisobotda qayd etilishicha, zararlarning asosiy qismi Eron tomonidan harbiy harakatlarning birinchi haftasida amalga oshirilgan javob zarbalari natijasida yuzaga kelgan. Nishonlar qatorida Iordaniya hududidagi aviabazada joylashgan Terminal High Altitude Area Defense (THAAD) raketaga qarshi mudofaa tizimi hamda AN/TPY-2 radar tizimi bo‘lgan. Tahlilga ko‘ra, AN/TPY-2 radar tizimining qiymati taxminan 485 million dollarni tashkil etadi.

 

Shuningdek, zarbalar Yaqin Sharqdagi AQSh harbiy bazalarining binolari va infratuzilmasiga ham zarar yetkazgan bo‘lib, uning qiymati qariyb 310 million dollarga baholanmoqda.

 

Sun’iy yo‘ldosh tasvirlari tahlili Eron kamida uchta AQSh aviabazasiga bir necha bor zarba berganini ko‘rsatgan. Bular — Ali al‑Salim aviabazasi (Quvayt), Al‑Udeid aviabazasi (Qatar) hamda Prince Sultan aviabazasi (Saudiya Arabistoni).

 

BBCga ko‘ra, takroriy zarbalar Eronning asosiy harbiy nishonlarni aniq mo‘ljalga olgan holda hujum qilganini ko‘rsatadi.

 

Avvalroq Pentagon rasmiylari senatorlar bilan yopiq brifing chog‘ida urushning dastlabki olti kunida AQSh kamida 11,3 milliard dollar sarflaganini ma’lum qilgan. ABC News xabariga ko‘ra, dastlabki ikki kunning o‘zida o‘q-dorilar uchun 5,6 milliard dollar sarflangan.