Erondaga zarbalar yaqin kunlarda kuchayadi — Isroil mudofaa vaziri
Isroil operatsiyalar barcha harbiy maqsadlar bajarilgunga qadar davom etishini bildirdi.
Isroil mudofaa vaziri Israel Katz yaqin kunlarda Eron hududidagi nishonlarga berilayotgan zarbalar sezilarli darajada oshirilishini ma’lum qildi. Bu haqda Ynet nashri xabar berdi.
Vazirning ta’kidlashicha, Isroil Mudofaa Kuchlari (IDF) hamda AQSh harbiylari tomonidan Eron rejimi va unga tegishli infratuzilma obyektlariga qarshi amalga oshirilayotgan zarbalar ko‘lami kengaytiriladi.
“IDF va AQSh harbiylari tomonidan Eron rejimi va u tayanadigan infratuzilmaga qarshi zarbalar intensivligi sezilarli darajada oshadi”, — degan vazir.
Uning so‘zlariga ko‘ra, hujumlar shu haftadan boshlab kuchayishi kutilmoqda. Isroilda operatsiyalar yakshanba kunidan yanada faollashishi mumkin.
Israel Katz shuningdek, IDF o‘z zimmasiga yuklatilgan vazifalarni bajarish uchun yetarli harbiy salohiyatga ega ekanini ta’kidlagan. Uning aytishicha, operatsiyalar belgilangan barcha harbiy maqsadlarga erishilgunga qadar davom etadi.
Avvalroq Abbos Aroqchi boshchiligidagi Eron tashqi ishlar vazirligi Tehron vaqtinchalik sulhga rozi bo‘lish niyatida emasligini bildirgan edi. Uning so‘zlariga ko‘ra, Eron AQSh va Isroil bilan qarama-qarshilikka yakuniy siyosiy kelishuv orqali barham berilishini talab qilmoqda.
