“Havoda Navro‘z iforini sezmaysiz”: Eron urush fonida bayramni qarshi oldi

Eron bu yil Navro‘z bayramini keskin harbiy vaziyat fonida nishonlamoqda. 28-fevraldan buyon davom etayotgan AQSh va Isroil zarbalari oqibatida mamlakatda xavfsizlik va iqtisodiy holat yomonlashib, an’anaviy bayram kayfiyati sezilmayapti.

 

 

Inson huquqlarini himoya qiluvchi tashkilot ma’lumotlariga ko‘ra, zarbalar natijasida 3 114 kishi halok bo‘lgan, ulardan 1 354 nafari tinch aholi, kamida 207 nafari bolalardir. Tehron bunga javoban AQSh harbiy bazalari joylashgan mintaqadagi mamlakatlarga zarba bermoqda.

 

Mahalliy aholining aytishicha, bu yilgi Navro‘z avvalgilardan tubdan farq qiladi. Damavandda yashovchi fuqarolar urush sabab kundalik hayot izdan chiqqanini, ayrimlar esa xavfsizlik sabab poytaxtdan ko‘chishga majbur bo‘lganini bildirgan. Tehron esa eng ko‘p zarbalarga uchragan hududlardan biri bo‘lib qolmoqda.

 

BBC suhbatdoshlari urush oqibatida ish o‘rinlari qisqarayotgani va infratuzilma zarar yetgani ham aholining asosiy xavotirlariga aylanganini bildirgan. Ayrimlar vaziyat davom etsa, mamlakat kelajagi xavf ostida qolishi mumkinligini ta’kidlamoqda.

 

 

“Odatda Navro‘z oldidan gavjum bo‘ladigan bozorlar va savdo markazlarida bu yil harakat sezilarli darajada kamaygan. Fuqarolar xarid paytida havo hujumlari xavfi borligini aytmoqda. Shunga qaramay, ayrimlar bayram an’analarini saqlashga urinib, xususan Haft Sin dasturxonini tayyorlamoqda”, deyiladi xabarda.

 

Biroq jamiyatda kayfiyat bir xil emas. Ba’zi fuqarolar bayramni nishonlash tarafdori bo‘lsa, boshqalar mavjud siyosiy tizim sharoitida Navro‘zning ahamiyati yo‘qligini bildirmoqda.

 

Mutaxassislar va kuzatuvchilar urush paytida nishonlanayotgan bu yilgi Navro‘z Eron jamiyatidagi ijtimoiy va ruhiy holatni yaqqol aks ettirayotganini qayd etishgan.

 

Eronliklar 1980-yillarda ham, Iroq bilan 8 yillik mojaro paytida, Navro‘zni shunday urush sharoitida nishonlagan.