Shavkat Mirziyoyev O‘zbekiston fuqarolarini Navro‘z bayrami bilan qutladi

Bugun Yangi O‘zbekiston bog‘ida Navro‘z munosabati bilan o'tkazilayotgan tantanali marosimda Shavkat Mirziyoyev mamlakat ahlini bayram bilan qutladi.

 

 

 

 

Prezident Navro‘zni tabiiy uyg‘onish va ruhiy yangilanish ramzi sifatida ta’kidlab, barcha yurtdoshlar, shuningdek, olis va yaqin mamlakatlarda yashayotgan vatandoshlarimizga ezgu tilaklarini izhor qildi. 

 

“Bahor faslida jonajon diyorimizga sharqona yangi yil kirib kelmoqda. Bugun Navro‘zni Ramazon hayiti bilan birga nishonlamoqdamiz. Bayram barchaga tinchlik va baxt olib kelsin”, — dedi davlat rahbari.

 

Prezident tabiat uyg‘onishi, osmondan yog‘ayotgan obirahmat va shahar hamda qishloqlarda sayil-tomoshalar boshlangani haqida so‘zlab, Navro‘z kunlarida xalqimizning birdamligi va bunyodkorlik salohiyati yanada ko‘zga tashlanayotganini ta’kidladi.

 

Shavkat Mirziyoyev bayram qadriyatlariga sodiqlik, millat, til va dinidan qat’i nazar barcha yurtdoshlarni rozi qilish yo‘lida olib borilayotgan ishlar yangi bosqichga ko‘tarilganini qayd etdi. Bu yilgi Navro‘z tadbirlari “Navro‘zni ulug‘lash – insonni ulug‘lashdir” shiori ostida o‘tkazilmoqda.

 

 

 

 

Prezident yangi ish o‘rinlari yaratish, kambag‘allikni kamaytirish, ijtimoiy himoyani kuchaytirish, zamonaviy korxonalar, uy-joylar, ta’lim, tibbiyot, madaniyat va sport obyektlarini barpo etish bo‘yicha amalga oshirilayotgan loyihalarga e’tibor qaratdi, yoshlarni zamonaviy bilim va kasblarni egallashga, barkamol avlod bo‘lib voyaga yetishga, yagona Vatan va yagona xalq sifatida yangi hayot va kelajak yaratishga chaqirdi. Mirishkor dehqon va fermerlar mehnati xalqimiz rizq-u nasibasini boyitayotgani va davlat tomonidan doimiy qo‘llab-quvvatlanishi ta’kidlandi.

 

Shuningdek, davlat rahbari ertaga nishonlanadigan Mahalla tizimi xodimlari kuni munosabati bilan jonkuyar mahalla raislari va faollarini, barcha yurtdoshlarni tabriklab, ularga yangi muvaffaqiyatlar tiladi.