AQSh va Eron o‘rtasida kelajakdagi muzokaralar bo‘yicha muhokamalar boshlandi — Axios
AQSh va Eron o‘rtasida to‘g‘ridan-to‘g‘ri aloqa bo‘lmasa-da, Misr va Qatar vositachilik qilmoqda.
Axios nashrining xabar berishicha, AQSh ma’muriyati Eron bilan kelajakda o‘tkazilishi mumkin bo‘lgan tinchlik muzokaralarining ehtimoliy yo‘nalishlarini muhokama qilishni boshlagan.
Nashr AQSh rasmiysi hamda boshqa manbalarga tayanib yozishicha, Tehron ham bunday muzokaralardan manfaatdor ekanini bildirgan.
Ma’lumotlarga ko‘ra, AQSh prezidenti ma’muriyatining elchisi Stiv Vitkoff hamda prezidentning kuyovi Jared Kushner ehtimoliy muzokaralar jarayonida ishtirok etmoqda. Axios manbalarining ta’kidlashicha, ular ilgari Jenevada o‘tkazilgan delegatsiyalar uchrashuvida taqdim etilgan shartlarga o‘xshash takliflar asosida ish olib bormoqda.
AQSh rasmiysi nashrga bergan izohida so‘nggi kunlarda Vashington va Tehron o‘rtasida to‘g‘ridan-to‘g‘ri aloqa bo‘lmaganini bildirgan. Shu bilan birga, Misr, Qatar va Buyuk Britaniya ikki davlat o‘rtasida vositachilik aloqalarini o‘rnatishga harakat qilayotgani qayd etilgan.
Manbalarga ko‘ra, Misr va Qatar AQSh tomoniga Eron muzokaralarda ishtirok etishga tayyorligini ma’lum qilgan. Shuningdek, maslahatlashuvlar davomida Eronga tegishli muzlatilgan aktivlarni qaytarish masalasi ham muhokama qilinishi mumkinligi aytilmoqda.
Eslatib o‘tamiz, Vashington va Tehron o‘rtasida Eron yadroviy dasturi bo‘yicha muzokaralar joriy yil 6-fevral kuni qayta boshlangan edi. So‘nggi bosqich 26-fevral kuni Jenevada bo‘lib o‘tgan.
Muzokaralarda Eron delegatsiyasiga Abbos Aroqchi, AQSh tomoniga esa Stiv Vitkoff va Jared Kushner boshchilik qilgan.
Fevral oyi oxirida Eron rasmiylari uranni boyitish jarayonini to‘xtatmasliklarini ma’lum qilgan edi. Texnik maslahatlashuvlarni mart oyining boshida Vena shahrida MAGATE hududida davom ettirish rejalashtirilgan, biroq 28-fevral kuni AQSh va Isroil tomonidan Eronga qarshi harbiy operatsiya boshlangani sababli jarayon to‘xtab qolgan.
