Endi mudofaa emas, hujum strategiyasiga o‘tdik — Eron generali
Tehron AQSh infratuzilma obyektlariga zarba berishi mumkinligi haqida ogohlantirdi.
Eron AQSh va Isroil bilan yuzaga kelgan keskinlik fonida harbiy strategiyasini o‘zgartirganini ma’lum qildi. Bu haqda Eronning Xatam al-Anbiyo markaziy shtabi qo‘mondoni, general-mayor Ali Abdullohiy bayonot berdi.
Uning so‘zlariga ko‘ra, Islom Respublikasi qurolli kuchlari mudofaa taktikasidan hujum strategiyasiga o‘tgan va urush olib borish usullari yangilangan.
General Abdullohiy Eron armiyasi imkon qadar samarali harakat qilayotganini ta’kidladi. U, shuningdek, mamlakatning yosh olimlari va harbiy mutaxassislari zamonaviy qurollar yaratish ustida ishlayotganini bildirib, bu qurollar raqiblarning hisob-kitoblarini buzishi mumkinligini qayd etdi.
“Qurolli kuchlar va g‘ayratli yosh olimlarimiz dushman hisob-kitoblarini izdan chiqarishi mumkin bo‘lgan zamonaviy qurollarni ishlab chiqmoqda. Dushmanlar buni ma’lum darajada anglab yetdi. Biz bu tendensiyani davom ettiramiz va jang maydonida yangi kutilmagan hodisalarni taqdim etamiz”, — dedi u.
Tehron avvalroq agar AQSh yoki Isroil Eronning yoqilg‘i-energetika infratuzilmasiga yana zarba bersa, Yaqin Sharqdagi Amerika energetika va axborot infratuzilmasi obyektlariga hujum qilishi mumkinligi haqida ogohlantirgan edi.
Shuningdek, Tasnim agentligi manbalariga ko‘ra, agar Xarg orolini egallab olishga urinish bo‘lsa, Tehron tomonidan “misli ko‘rilmagan” javob choralari ko‘rilishi mumkin.
Mazkur orol Eron neft eksporti uchun strategik ahamiyatga ega bo‘lib, mamlakat xom neft eksportining qariyb 90 foizi aynan shu terminal orqali amalga oshiriladi.
22-mart kuni Donald Tramp Tehronga ultimatum qo‘yib, agar Hormuz bo‘g‘ozi 48 soat ichida ochilmasa, Eronning elektr stansiyalariga zarba berilishi mumkinligini bildirgan edi. Bunga javoban Tehron mintaqadagi AQSh energetika va axborot infratuzilmasi obyektlariga qarshi javob zarbalari berilishini ma’lum qildi.
